आर्थिक बर्ष सकिन ११ दिन बाँकी रहदाँ सरकारकाे खर्च १२ खर्ब ९१ अर्ब ४६ करोड, पुँजीगत खर्च कति ?

काठमाडौं । आर्थिक वर्ष २०७९/८० को करिब अन्त्यसम्ममा राजस्व र खर्च दुवैको लक्ष्य भेट्न सरकार असफल भएको छ । महालेखा नियन्त्रक कार्यालयको तथ्यांकअनुसार यो अवधिसम्म ७१.९९ प्रतिशत कुल बजेट खर्च र राजस्व लक्ष्यको ६२.६८ प्रतिशत मात्र संकलन भएको हाे ।

पुँजीगत खर्च ४६‍.४१ प्रतिशतमा सीमित भयो । चालु खर्च ८०.८३ प्रतिशत प्रगति भयो । वित्तीय व्यवस्थातर्फको प्रगति ६८.८९ प्रतिशतमा सीमित भएको महालेखा नियन्त्रक कार्यालयको तथ्यांकमा उल्लेख छ ।

तथ्यांकअनुसार चालु आ.व. २०७९/८० मा सरकारले कुल १७ खर्ब ९३ अर्ब ८३ करोड रुपैयाँ बराबरको बजेट ल्याएको थियो । यो बजेटबाट चालु आ. व. सकिन ११ दिन बाकी रहदाँ खर्च भने १२ खर्ब ९१ अर्ब ४६ करोड ८० लाख रुपैयाँ मात्र भएको छ ।

यो वर्ष सरकारले चालु प्रकृतिको खर्चका लागि ११ खर्ब ८३ अर्ब २३ करोड रुपैयाँ छुट्याएको थियो । यो सरकारको अनिवार्य दायित्व (तलव भत्ता, सामाजिक सुरक्षा, स्थानीय तथा प्रदेशमा जाने अनुदान) सहितको रकम हो । यसबाट खर्च प्रगति भने ९ खर्ब ५६ अर्ब ३५ करोड रुपैयाँ ९८०.८३ प्रतिशत मात्र भएको छ ।

विकास निर्माणका काममा खर्च हुने पूँजीगत प्रकृतिको खर्चतर्फ भने सरकारले यो वर्ष ३ खर्ब ८० अर्ब ३८ करोड ४५ लाख रुपैयाँको लक्ष्य राखेको थियो । प्रगति भने मात्र १ खर्ब ७६ अर्ब ५२ करोड २० लाख रुपैयाँ भएको छ । यो कुल लक्ष्यको ४६.४१ प्रतिशत हो ।

नेपाल सरकारले विभिन्न सार्वजनिक संस्थानमा गर्ने लगानी वित्तीय व्यवस्थातर्फको खर्च समेत लक्ष्यको दुई तिहाइको हाराहारीमा मात्र भएको छ । यो वर्ष २ खर्ब ३० अर्ब २१ करोड ७७ लाख रुपैयाँ वित्तीय व्यवस्थामा खर्च हुने लक्ष्य राखिएकोमा प्रगति भने १ खर्ब ५८ अर्ब ५८ करोड ९६ लाख रुपैयाँ खर्च भएको छ । यो कुल लक्ष्यको ६८.८९ प्रतिशत हो ।

असार २० गते सम्म कति भयो खर्च ?

जेठ मसान्तसम्म ११ खर्ब ७६ अर्ब खर्च भएको थियो । असार २० सम्म मात्रै १ खर्ब १५ अर्ब ४० करोड खर्च भएको छ । जेठ मसान्तसम्म १ खर्ब ५३ अर्ब रहेको विकास खर्च १ खर्ब ७६ अर्ब पुगेको हो । असार २० सम्ममा मात्रै २३ अर्ब ४३ करोड विकास खर्च भएको छ । कुल विकासको ६.२ प्रतिशत विकास खर्च यस अवधिसम्म भएको छ ।

८ खर्ब ७१ अर्ब ५० करोड उठ्यो राजस्व

असार २० गते सम्म राजस्व संकलन ६२.११ प्रतिशत उठ्न सफल भयो । सरकारले चालु आवको बजेट ल्याउने समयमा अपेक्षीत राजस्व उठ्ने लक्ष्य पुरा नहुने सम्भावना प्रवल देखिएको छ ।

असारको यस अवधिसम्म आइपुदाँ कुल ८ खर्ब ७१अर्ब ५० करोड रुपैयाँ राजस्व संकलन गरेको छ । संकलित राजस्वमध्ये कर राजस्व ७ खर्ब ९० अर्ब ९५ करोड रुपैयाँ रहेको छ ।

गैरकर राजस्व भने लक्ष्यभन्दा केहि मात्र कम उठेको छ । गैरकर राजस्व ८० अर्ब ५५ करोड मात्र उठेको छ । यो कुल लक्ष्यको ७४.७५ प्रतिशत हो । सरकारले यो वर्ष अनुदान प्राप्तीमा समेत उल्लेख्य सफलता पाएन ।

कुल ५५ अर्ब ४५ करोड रुपैयाँ अनुदान आउने लक्ष्य राखिएकोमा प्राप्ति भने मात्र ४ अर्ब ८० करोड रुपैयाँ मात्रै छ । यो लक्ष्यको ८.६६ प्रतिशत हो ।