कृषकको सारथी गुलाब बहुउद्देश्यीय सहकारी « Devoted for Economic Devlopment, आर्थिक विकासको लागि समर्पित
३ मंसिर २०८३, बिहिबारThursday, November 19, 2026

अर्थबजार स्टोरी

कृषकको सारथी गुलाब बहुउद्देश्यीय सहकारी

यो समाचार सुन्नुहोस्अडियो तयार हुँदैछ, केही मिनेटपछि फेरि हेर्नुहोस्

रुपन्देही। रुपन्देहीको सैनासैना–८, बासगढीमा रहेको गुलाब बहुउद्देश्यीय सहकारी संस्थाले कृषकलाई व्यवसायीक बनाउने याेजनालाई प्रथामिकतामा राखेको छ । आफ्नो कार्य क्षेत्र भित्र रहेका सदस्यहरुलाई रोजगारीका लागि अन्यन्त्र भाैतारिनु पर्ने बाध्यता अन्त्य गर्नको लागि संस्था आधुनिक कृषिका कार्यक्रमलाई प्रथामिकता दिएर कार्य गर्दै आएको हो ।

बचत ऋणको कार्यक्रमसंगै स‌‌‌ंस्थालाई आफ्ना सदस्यहरुलाई आर्थिक रुपमा सबल बनाउनु नै मुल उद्देश्य रहेको संस्थाका अध्यक्ष गोपाल भण्डारीले जानकारी दिए । कृषकका उत्पादनको बजारीकरण सुनिश्चित गर्न सके रोजगारी वृद्धि हुने र कामको खोजीमा सदस्यहरुले भौंतारिनु नपर्ने उनको विश्वास छ ।

प्रदेश सरकारसँगको साझेदारीमा केरा कटेज

संस्थाले प्रदेश सरकारसँगको साझेदारीमा ४२ लाख लगानीमा केरा खेती शुरु गर्नुका साथै केरा कटेज समेत निर्माण गरेको छ । गत वर्षदेखि संस्थाले ३ बिगाहा क्षेत्रफलमा केरा खेती लगाएको र कमजोर आर्थिक स्थिति भएका सदस्यहरुलाई दैनिक रोजगार दिँदै आएको अध्यक्ष गोपाल भण्डारीले जानकारी दिए । केरा खेतीमा सिजनमा चालीसपचास जना र अन्य समयमा पनि दैनिक पाँच देखि छ जनाले काम पाउने गरेका छन् ।

केरा खेतीलाई अझै विस्तार गर्ने र मम, चिप्स, जुस, अचार जस्ता थुप्रै परिकारहरु केराबाटै उत्पादन गर्ने योजना संस्थाको रहेको भण्डारीले सुनाए । अहिले बजारमा केराको माग अत्याधिक रहेको र केरा लगाएको १६ महिनापछि फल दिने हुँदा त्यसबाट राम्रो लाभ लिन सकिने उनको बिश्वास छ । एक पटक लगाएको केराको बोटबाट छ वर्षसम्म फल लिन सकिने उनले सुनाए ।

३५ हजारसम्म निर्ब्याजी ऋण


सहकारी संस्थामा आवद्ध रहेका करिब २५०० सदस्यलाई कुनै न कुनै व्यवसायमा जोडी सबल बनाउनु नै मुल योजना रहेको अध्यक्ष भण्डारी बताउँछन् । संस्थाले नगदे बाली र बेमौसमी तरकारी खेती गर्न चाहने सदस्यलाई ३ महिना अवधिका लागि ३५ हजारसम्म निर्ब्याजी ऋण उपलब्ध गराउँदै आएको छ । संस्थाका सदस्य रेवीलाल न्यौपानेले ८÷९ कठ्ठामा आलुखेती गर्दै आएका छन् । उनलाई आलु खेतीका लागि आवश्यक पर्ने पुँजी तथा बीउ संस्थाले सहुलियत दरमा उपलब्ध गराउँदै आएको छ । उनले उत्पादन गरेको आलु बीउको रुपमा विक्री हुने गर्छ । ७०/०७१ सालबाट ३५ हजार निर्ब्याजी ऋण लिएर आलुखेती सुरु बताए । उनले वार्षिक ३ लाखसम्म आम्दानी गरेको सुनाए । आलु खेतीबाट राम्रो लाभ लिन सक्ने भएपनि त्यस भेगमा कोल्डस्टोर नहुँदा बीउका लागि आलु सञ्चित गर्न भैरहवा लैजानु पर्ने बाध्यता रहेको उनले सुनाए ।

संस्थाका व्यवस्थापक मुकुन्द पराजुलीले रुपन्देही भर कार्यक्षेत्र लिएर २०५९ सालमा २५ हजार शेयरपुँजीबाट शुरु गरिएको संस्थामा हाल पच्चीस सय सदस्य, ३ करोड शेयरपुँजी र १३ करोड लगानी पुगेको बताए । संस्थाले आफ्नै भवन समेत निर्माण गरेको छ । संस्थाले सदस्यका लागि एम्बुलेन्स सेवा समेत सञ्चालनमा ल्याएको छ भने महिला शेयर सदस्यहरुलाई सुत्केरी हुँदा पोषण खर्च, मृत्यु राहत स्वरुप काजकिरिया खर्च, ज्येष्ठ नागरिकहरुलाई वार्षिक रुपमा पेन्सन जस्ता थुप्रै सुविधा प्रदान गर्दै आएको छ ।

गुलाब बहुउद्देश्यीय सहकारी संस्थाद्वारा संचालित एम्बुलेन्स

यस्तै बर्षमा १ पटक शेयर सदस्यलाई कृषि तालिमको ब्यवस्था मिलाउने योजनामा सस्था रहेको व्यवस्थापक पराजुलीले सुनाए । आउदा दिनमा शेयर सदस्यले ५ कठ्ठामा लसुन र प्याज खेति गर्न चाहेको खण्डमा संस्थाबाट ३ महिनाको लागि निःशुल्क ब्याजमा २५००० सम्म सहुलियत ऋण उपलब्ध गराइराइने पराजुलीले बताए । यस्तै संस्थाले एक व्यक्ती एक सहकारीको नितिलाई अनिवार्य रुपमा अवलम्बन गर्ने उनले बताए ।

सदस्यको घरमा सामाजिक क्रियाकलाप, विवाह, ब्रतबन्ध, पुजाआजा हुँदा अर्को सदस्यले उत्पादन गरेको वस्तु खरिद गराई स्वयं सदस्यहरुलाई नै लाभान्वित बनाउने संस्थाको लक्ष्य छ । त्यसैगरी संस्थाले सदस्यहरुलाई आवश्यक पर्ने बीउबीजन, मलखाद र भण्डारण केन्द्र समेत स्थापना गरी सेवा दिँदै आएको छ ।

प्रकाशित : २९ मंसिर २०७८, बुधबार ११:४३ 15 December, 2021 11:43 am

प्रतिक्रिया

तपाईंको प्रतिक्रिया लेख्नुहोस्

तपाईंको इमेल प्रकाशित हुने छैन। प्रतिक्रिया स्वीकृत भएपछि देखिनेछ।