१९ अर्ब ६६ करोड ६५ लाख रुपैयाँ बराबरको आइपीओ आउँदै

तपाई संग पैसा छ? सानो लगानीबाट राम्रो प्रतिफलको आशा राख्नु भएको छ भने २९ कम्पनीहरुले साधारण सेयर (आइपीओ) निष्कासन गर्ने भएका छन । पूर्वाधार बैंक, बिमा, जलविद्युत, मर्चेन्ट बैंकर र सेवा क्षेत्रका ती कम्पनीहरुले १९ अर्ब ६६ करोड ६५ लाख रुपैयाँ बराबरको १९ करोड ६६ लाख ६५ हजार कित्ता आइपीओ निष्कासन गर्न लागेका हुन ।

यी मध्ये १३ कम्पनीले साधारणसभाबाट पारित गरी निष्कासनका लागि नेपाल धितोपत्र बोर्डमा आवेदन दिएका छन । १३ कम्पनीले ४ अर्ब १८ करोड १५ लाख ५९ हजार ६०० रुपैयाँ बराबरको ४ करोड १८ लाख १५ कित्ता आईपीओ निष्कासन गर्न लागेका हुन ।

कम्पनीहरुको प्रस्तावको बोर्डले अध्ययन गरिरहेको छ । यस्तै १५ अर्ब ४८ करोड ५० लाख रुपैयाँ बराबरको आईपीओ निष्कासन गर्न १६ कम्पनीहरुले सञ्चालक समितिबाट पारित गरी धितोपत्र बोर्डमा निवेदन दिने तयारीमा छन ।