१२ बैंकको लाभांश घोषणा, कुन बैंकले दिँदैछ सबैभन्दा धेरै ?

काठमाडौं । गत आर्थिक वर्ष २०८२/८३ को नाफाबाट हालसम्म १२ वाणिज्य बैंकले सेयरधनीलाई लाभांश घोषणा गरेका छन्। घोषणा गरिएका लाभांशमध्ये केही बैंकले साधारणसभाबाट पारित गरिसकेका छन् भने केहीको साधारणसभा तथा बुक क्लोज प्रक्रिया बाँकी छ।

हालसम्म लाभांश घोषणा गरेका १२ बैंकमध्ये आठ बैंकले बुक क्लोज गरी वार्षिक साधारणसभासमेत सम्पन्न गरिसकेका छन्। बाँकी चार बैंकमा नेपाल एसबिआई बैंक, लक्ष्मी सनराइज बैंक, स्ट्यान्डर्ड चार्टर्ड बैंक र एनएमबी बैंक रहेका छन्।

यीमध्ये नेपाल एसबिआई, लक्ष्मी सनराइज र स्ट्यान्डर्ड चार्टर्ड बैंकले बुक क्लोज मिति तय गर्न बाँकी छ। एनएमबी बैंकले भने आगामी मंसिर २५ गते वार्षिक साधारणसभा बोलाएको छ। साधारणसभा तथा लाभांश वितरण प्रयोजनका लागि बैंकले मंसिर ११ गते बुक क्लोज गर्ने निर्णय गरेको छ।

गत आर्थिक वर्षको नाफाबाट सबैभन्दा बढी लाभांश घोषणा गर्ने बैंक सिद्धार्थ बैंक बनेको छ। बैंकले १० प्रतिशत बोनस सेयर र १० प्रतिशत नगद गरी कुल २० प्रतिशत लाभांश दिने प्रस्ताव गरेको छ।

त्यसपछि स्ट्यान्डर्ड चार्टर्ड बैंकले १६ प्रतिशत नगद, नबिल बैंकले १५.८ प्रतिशत र एभरेष्ट बैंकले १५ प्रतिशत लाभांश घोषणा गरेका छन्।

नेपाल एसबिआई बैंकले शुक्रबार ३.४० प्रतिशत बोनस सेयर र ४.८५ प्रतिशत नगद गरी कुल ८.२५ प्रतिशत लाभांश घोषणा गरेसँगै लाभांश घोषणा गर्ने वाणिज्य बैंकको संख्या १२ पुगेको हो। बैंकको प्रस्तावित लाभांश नेपाल राष्ट्र बैंकको स्वीकृति र आगामी साधारणसभाबाट पारित भएपछि वितरण हुनेछ।

हालसम्म लाभांश घोषणा गरेका बैंकमध्ये बोनस सेयर र नगद दुवै दिने बैंकको संख्या पाँच रहेको छ। सिद्धार्थ बैंकले १० प्रतिशत बोनस सेयर र १० प्रतिशत नगद, नबिल बैंकले ५ प्रतिशत बोनस सेयर र १०.८ प्रतिशत नगद तथा एभरेष्ट बैंकले ५ प्रतिशत बोनस सेयर र १० प्रतिशत नगद लाभांश दिने घोषणा गरेका छन्।

त्यस्तै, ग्लोबल आइएमई बैंकले ४ प्रतिशत बोनस सेयर र ६ प्रतिशत नगद गरी कुल १० प्रतिशत, माछापुच्छ्रे बैंकले ३ प्रतिशत बोनस सेयर र ३ प्रतिशत नगद गरी कुल ६ प्रतिशत तथा सिटिजन्स बैंक इन्टरनेसनलले ३.८ प्रतिशत बोनस सेयर र ०.२ प्रतिशत नगद गरी कुल ४ प्रतिशत लाभांश घोषणा गरेका छन्।

नगद लाभांश मात्रै दिने बैंकमध्ये स्ट्यान्डर्ड चार्टर्ड बैंक नेपाल सबैभन्दा अगाडि छ। बैंकले १६ प्रतिशत नगद लाभांश दिने घोषणा गरेको छ। त्यस्तै, सानिमा बैंकले १० प्रतिशत, एनएमबी बैंकले ७ प्रतिशत र कुमारी बैंकले २.१०५३ प्रतिशत नगद लाभांश दिने भएका छन्।

लक्ष्मी सनराइज बैंकले भने ५ प्रतिशत बोनस सेयर र ०.२६ प्रतिशत नगद गरी कुल ५.२६ प्रतिशत लाभांश घोषणा गरेको छ।

यसरी गत आर्थिक वर्षको नाफाबाट लाभांश घोषणा गर्ने बैंकमध्ये सिद्धार्थ बैंक सबैभन्दा अगाडि देखिएको छ भने नेपाल एसबिआई बैंकको पछिल्लो घोषणासँगै लाभांश घोषणा गर्ने बैंकको संख्या थपिएको छ।