हेलम्बुका बाढी पीडितलाई शुक्रपथ बहुउद्देश्यीय सहकारीको राहत

काठमाडौं । प्युखा, न्यूरोडमा प्रधान कार्यालय रहेको शुक्रपथ बहुउद्देश्यीय सहकारी संस्थाले सिन्धुपाल्चोकको हेलम्बुका बाढी पीडितलाई राहत वितरण गरेको छ ।

संस्थाले असार १ गते मेलम्ची र ईन्द्रावती नदीमा आएको बाढीमा घरबास गुमाएर विस्थापित भएका परिवारलाई निर्माण सामाग्री र खाद्य सामाग्री वितरण गरेको हो ।

बाढी पहिरोबाट विस्थापित एवं पीडित परिवारलाई आवास निर्माण गर्नका लागि संस्थाले १५ बण्डल जस्ता पाता र २० थान त्रिपाल प्रदान गरेको संस्थाका अध्यक्ष नरेन्द्र विष्टले बताउनुभयो ।

यसैगरी संस्थाले बाढी पीडितलाई १५ बोरा चिउरा, १ बोरा दालमोठ, २० कार्टुन चाउचाउ लगायतका खाद्य राहत सामग्री समेत वितरण गरेको जानकारी गराउनुभयो ।

सहकारीको सामाजिक उत्तरदायित्व शीरोपर गर्दै संस्थाले बाढी पीडितलाई राहत उपलब्ध गराएको हो ।

संस्थाका अध्यक्ष, पदाधिकारी तथा कर्मचारीहरुको टोलीले हेलम्बु गाउँपालिका वडा नं. ४ का वडाध्यक्ष राज कुमार लामिछानेलाई राहत हस्तान्तरण गरेको थियो । संस्थाका संचालक एवम् सूचना अधिकारी अर्जुन बिश्वकर्माको संयोजकत्वमासम्पन्न भएको थियो।