हेलिकप्टर दुर्घटनाःमन्त्री रवीन्द्र अधिकारीसहित ७ यात्रुको मृत्यु

काठमाडाै । संस्कृति, पर्यटन तथा नागरिक उड्डयनमन्त्री रवीन्द्रप्रसाद अधिकारीसहित सवार एयर डाइनेष्टीको हेलिकोप्टरका सबै यात्रुको निधन भएको खबर प्राप्त भएको छ ।

ताप्लेजुङको दारेढुङ्गामा आज सो हेलिकप्टर दुर्घटनामा परेको थियो । ताप्लेजुङको दारेभीरमा भएको दुर्घटनास्थलमा सुरक्षाकर्मी पुग्दा हेलिकप्टर आगलागी भएको अवस्थामा भेटिएको गृह मन्त्रालय स्रोतले जनाएको छ ।

मन्त्री अधिकारी र पाइलट छ जनाको टोली तेह्रथुमको चुहानडाँडा विमानस्थलको सम्भाव्यता अध्ययन भएको स्थलका लागि गएको थियो ।

हेलिकप्टरमा आङछिरिङ शेर्पा, अर्जुन घिमिरे, वीरेन्द्र श्रेष्ठ, वीरेन्द्रबहादुर बुढाथोकी र युवराज दाहाल सवार थिए । उनीहरु सबैको निधन भएको अपुष्ट समाचार प्राप्त भएको हो ।

दुर्घटना भएपछि उद्दारका लागि टोली परिचालन गरिएको छ । उद्दारका लागि काठमाडौंबाट नेपाल आर्मीको दुईवटा हेलिकोप्टर र एयर डाइनेस्टीको परिचालन गरिएको छ ।

पाथीभरा दर्शन गरी फर्कने क्रममा हेलिकप्टर माथिल्लो फेदी नजिकको भीरमा दुर्घटनाग्रस्त भएको हो । एएमआई (अल्फा माइक इन्डिया) कल साइन भएको उक्त हेलिकप्टर काठमाडौंबाट बिहान साढे ८ बजे उडेको थियो ।