मन्त्रीपरिषदको बैठकः नियुक्तिदेखि निर्माणसम्मका निर्णय

काठमाडाै । सरकारले पुर्व पश्चिम राजमार्ग भन्दा पनि लामो राजमार्ग बनाउने निर्णय गरेको छ । आइतबार बेलुका बसेको मन्त्रीपरिषदको बैठकले झापाको शान्तिनगरदेखि डडेलधुराको रुपालसम्म करिब १२ सय किमी सडक बनाउने प्रस्ताव स्वीकृत गरेको हो ।

सूचना तथा संचार राज्य मन्त्री तथा सरकारका प्रबक्ता गोकुल बास्कोटाले भौतिक तथा यातायात मन्त्रालयको उक्त प्रस्ताव पारित गरिएको बताए । साथै उनले राजमार्गको नाम मदन भण्डारी राजमार्ग रहने जानकारी दिए ।

त्यस्तै बैठकले सोमबार संसदमा पेश हुने नीति तथा कार्यक्रम सम्बन्धि प्रस्ताव पारित गरेको छ । बीमा संस्थानको प्रशासकमा कवी प्रसाद पाठकलाई नियुक्त गर्ने निर्णय गरेको छ ।

बैठकले सबै मन्त्रीहरुको सम्पती विवरण सार्बजनिक गर्ने निर्णय गरेको छ भने प्रदेश मन्त्रालयको कर्मचारी दरवन्दी स्वीकृत गरेको छ । मन्त्रिपरिषद् बैठकले सुन तस्करीबारे अनुसन्धान गर्न बनेको उच्चस्तरीय समितिको म्याद थप गरेको छ । समितिले अब जेठ मसान्तसम्म समय पाएको छ ।

बैठकले प्रदेश नम्बर २ का मुख्य मन्त्री लालबाबु राउतलाई अमेरिका नपठाउने निर्णय गरेको छ । राउतले एक मधेशी एनजिओको कार्यक्रममा भाग लिन जान स्वीकृति मागेका थिए ।