आदिवासी जनजातिको अधिकार कसैको निगाहमा प्राप्त भएको होइन : आङ्देम्बे

काठमाडौं । नेपाली कांग्रेस संसदीय दलका नेता भीष्मराज आङ्देम्बेले संविधानको रक्षा गर्ने कार्यकारी निकायबाटै संविधानप्रति शंका उत्पन्न हुने गतिविधि भइरहेकाले त्यसतर्फ सचेत हुनुपर्ने बताएका छन् ।

३२औँ विश्व आदिवासी दिवसका अवसरमा आयोजित कार्यक्रममा बोल्दै आङ्देम्बेले संविधानलाई ‘सगरमाथाभन्दा उचो’ बनाउने संकल्प व्यवहारमा कार्यान्वयन गर्नुपर्नेमा जोड दिए ।

उनले संविधानको उपलब्धिमाथि पटक–पटक घोचपेच भइरहेकाले संविधानमाथि उत्पन्न भएको शंकाको कालो बादल पूर्ण रूपमा हटिसकेको अवस्थामा आफूहरू ढुक्क भएर बस्न नसक्ने बताए ।

उनले भने, ‘संविधानको रक्षा गर्नुपर्ने कार्यकारी निकायबाटै संविधानप्रति पटक–पटक घोचपेच भइरहेको छ । त्यसैले संविधानमाथि उत्पन्न भएको शंकाको कालो बादल हटिसकेको भनेर ढुक्क भएर बस्ने अवस्था छैन । संविधानलाई सगरमाथाभन्दा उचो बनाउने संकल्प व्यवहारमै कार्यान्वयन गर्नुपर्छ ।’

आङ्देम्बेले नेपालको संविधानमार्फत आदिवासी जनजाति, महिला, दलित, मधेसी, अल्पसंख्यक, सीमान्तकृत, मुस्लिम तथा थारूलगायत समुदायका आवाज, पहिचान र विचारलाई संवैधानिक रूपमा सुनिश्चित गरिएको उल्लेख गरे । उक्त उपलब्धि कसैको निगाहमा प्राप्त नभएको भन्दै उनले त्यसका लागि अग्रज, समकालीन र पछिल्लो पुस्ताका व्यक्तिहरूले लामो संघर्ष गरेको बताए ।

‘यो उपलब्धि प्राप्त गरेर संविधानमा लेखाउन धेरै रगत र पसिना बगेको छ,’ उनले भने, ‘आदिवासी जनजाति र यस उपलब्धिमाथि गर्व गर्ने सबै वर्ग तथा समुदायले बगाएको पसिना र रगत कसैको लहडमा बोलिने विषयवस्तु बन्नु हुँदैन ।’

आङ्देम्बेले अधिकारका विषयमा सामाजिक सञ्जालमा आवाज उठाउने तर वास्तविक रूपमा शक्ति प्रदर्शन र एकता देखाउनुपर्ने समयमा समुदायका सदस्यहरू पछि हट्ने प्रवृत्तिप्रति पनि सचेत हुनुपर्ने बताए ।

‘कहिलेकाहीँ भीड आफ्नो उपस्थिति देखाउनका लागि हुन्छ भने कहिलेकाहीँ त्यही भीडमार्फत आफ्नो शक्ति र एकता प्रस्तुत गर्नुपर्ने हुन्छ,’ उनले भने, ‘आदिवासी अधिकारका लागि फेसबुक, लेख तथा सामाजिक सञ्जालमा हामी धेरै ठूला कुरा गर्छौं। तर शक्ति प्रदर्शन र एकता देखाउनुपर्ने बेला फेरि घरकै कुनामा थन्किने अवस्था देखिन्छ। यसप्रति पनि हामी सचेत हुनुपर्छ ।’

उनले आदिवासी जनजातिका अधिकार र संविधानले सुनिश्चित गरेका उपलब्धिको संरक्षणका लागि एकता र सक्रिय सहभागिता आवश्यक रहेको बताए ।