केन्या संसदद्वारा चन्द्र टण्डन सम्मानित

काठमाडौं । नेपालका लागि केन्या गणराज्यका मानार्थ कन्सुल चन्द्र टण्डनलाई केन्या संसदले औपचारिक रूपमा संसदीय प्रशंसा प्रदान गरेको छ। यो सम्मानले नेपाल–केन्या कूटनीतिक सम्बन्धलाई नयाँ स्तरमा पुर्‍याएको छ। केन्याको राष्ट्रिय सभाबाट गरिएको यो दुर्लभ मान्यताले टण्डनद्वारा दक्षिण एशियामा विशेषगरी नेपालमा अग्रसर गरिएको आर्थिक कूटनीति, व्यापार विस्तार र पर्यटन प्रवर्द्धनमा देखिएको प्रभावलाई उच्च मूल्यांकन गरेको बताइएको छ।

नेपाल–केन्या कूटनीतिक सक्रियता तीव्र

२०२५ जुनमा काठमाडौंमा केन्याको कन्सुलेट कार्यालय औपचारिक रूपमा उद्घाटन गरिएको थियो। त्यसयता, टण्डनको नेतृत्वमा व्यापार, पर्यटन र कन्सुलर सेवालाई सुदृढ बनाउने कार्यले दुवै देशबीच प्रत्यक्ष सहकार्य विस्तार भएको केन्या संसदले उल्लेख गरेको छ।

व्यापार र पर्यटन प्रवर्द्धनमा उल्लेखनीय योगदान

कन्सुल टण्डनले नेपालमा केन्याका उत्पादनका लागि नयाँ बजार पहुँच निर्माण गर्न सक्रिय भूमिका खेलेका छन्।
त्यसैगरी, नेपालका हिमाली साहसिक गन्तव्य र केन्याका वन्यजन्तु सफारी तथा समुद्री पर्यटनलाई दुवैतर्फका पर्यटकलाई आकर्षित गर्ने संयोजनमा उनले अघि सारेका परियोजना उच्च प्रभावकारी ठहरिएका छन्।

कन्सुलर सेवामा प्रभावकारी नेतृत्व

नेपालमा रहेका साना तर बढ्दो केन्याली समुदायका लागि आवश्यक कन्सुलर सहयोग उपलब्ध गराउँदै तण्डनले मानवीय तथा समुदाय–मैत्री कूटनीतिलाई बलियो बनाएका छन्। उनको सक्रिय भूमिकाले केन्याले विश्वभर अपनाइरहेको “स्वेच्छिक राजदूत” रणनीति कुशलरूपमा नेपालमा कार्यान्वयन भएको संसदको टिप्पणी छ।

भविष्यका संयुक्त परियोजनाको मार्ग खुल्दै

केन्या संसदले गरेको सार्वजनिक प्रशंसालाई विश्लेषकहरूले दुवै देशबीच संरचनागत सहकार्य, सांस्कृतिक आदानप्रदान र संयुक्त आर्थिक परियोजनाका लागि नयाँ ढोका खुलिएको संकेतका रूपमा लिएका छन्।