राष्ट्रिय सहकारी महासंघकी अध्यक्ष मल्ल ‘पाँच तारा राष्ट्रिय सहकारी व्यक्तित्व’ बाट सम्मानित

पाँच तारा बचत तथा ऋण सहकारी संस्थाले राष्ट्रिय सहकारी महासंघकी अध्यक्ष ओमदेवी मल्ललाई सम्मान गरेको छ । ‘ पाँच तारा राष्ट्रिय सहकारी व्यक्तित्व सम्मान २०८१’ बाट संस्थाले अध्यक्ष मल्ललाई सम्मान गरेको हो । ‘अग्रजको सम्मान सभ्यताको पहिचान’भन्ने नाराका साथ संस्थाले १७ औं बार्षिकोत्सवको अवसरमा अध्यक्ष मल्ललाई ५१ हजार १ सय ११ रुपैँयाँ नगद सहित ताम्पत्रले सम्मान गरेको हो ।

संस्थाका अध्यक्ष भोला नाथ पाठकको अध्यक्षता तथा रािष्ट्रय सहकारी महासंघका संस्थापक अध्यक्ष दिपक प्रकाश बाँस्कोटाको प्रमुख आतिथ्यतामा कार्यक्रम सम्पन्न भएको हो । कार्यक्रमका प्रमुख अतिथि बाँस्कोटाले अध्यक्ष मल्ललाई सम्मान गरेका थिए ।

सम्मानित मल्लले कार्यक्रममा मन्तव्य राख्दै यो सम्मानले आफुलाई थप जिम्मेवार बोध गराएको बताइन् । अध्यक्ष मल्लले सरकारले गर्नुपर्ने काम प्रारम्भिक सहकारी संस्थाले गरेको भन्दै सहकारी अभियानमा योगदान गर्ने अभियान्ताहरुलाई सम्मान गर्ने सोच सकरात्मक भएको बताइन् ।

उनले राष्ट्रिय अर्गनाइजेशनले गर्ने काम प्रारम्भिक सहकारीले गर्नु आफैमा गर्वको विषय भएको बताइन् । सदस्य र समुदाय केन्द्रीत संस्थाले सहकारी मूल्य, मान्यता र सिद्धान्तमा सञ्चालित भई समाजमा राम्रो छाप छाड्न सकेको उनको भनाई छ । सहकारी क्षेत्र विषम परिस्थितिबाट गुज्रेको र वितेका केही बर्ष यो क्षेत्रले थुप्रै कुराको सामना गर्नु परेको मल्लको भनाई छ ।

सहकारी क्षेत्रको समस्या समाधान गर्न सरकार र अभियानसँगै मिलेर हिडेको र क्रमश केही सुधार गर्दै लगेको समेत सो अवसरमा उनले बताइन् । सरकारले सहकारी क्षेत्रको समस्या समाधान गर्न प्रतिस्थापन विधेयक मार्फत् ऐन संशोधन गरेको भन्दै अध्यक्ष मल्लले अभियानले उठाएका केहि  कुरा सम्बोधन भएको उनको भनाई छ ।

अभियानमैत्री ऐन बनाउन आफुले निरन्तर पहल गर्दै आएको उनले जानकारी दिइन् । सहकारी क्षेत्रको नियमनको लागि सहकारी प्राधिरकण गठन भई सकेकाले बचत ऋणको कारोबार गर्ने सहकारी संस्थाहरु रि रजिष्ट्रेशन गरी नियमन तथा अनुगमन गर्ने उनले जनाइन् । सहकारी लागि कर्जा सूचना केन्द्र,ऋण असुली न्यायाधिकरण, बचत तथा कर्जा सुरक्षण कोष स्थापनाको लागि समेत पहल  भई राखेको र सरकारले छिट्टै ल्याउने उनले जानकारी दिइन् ।

संविधान सदस्य हुँदा सहकारीमा महिला नेतृत्वको लागि आफुले पहल गरेको भन्दै उनले अहिले ऐनमा नै व्यवस्था गरेर ३३ प्रतिशत महिलाको सुनिश्चतता भएको बताइन् ।

संस्थाका सञ्चालक,कर्मचारी र सदस्यले सहकारी बुझ्न आवश्यक रहेको भन्दै मल्लले सञ्चालकले सदस्यको कर्तव्य बुझाउनु पर्ने उल्लेख गरिन् । नेपालमा नै  सहकारीमा डिप्लोमा र मास्टर युनिर्भसिटीको सुरुवात गरेको जानकारी दिदैँ मल्लले शिक्षा तथा तालिम लिएर काम गर्दा संस्थामा धेरै फरक आउने बताइन् । उनले पाँच तारा जस्ता सहकारी समुदायमा भएको भए  यस्ता समस्या नआउने बताइन् ।