क्यान इन्फोटेक २०२५ः राष्ट्रिय परिचयपत्र बनाउनेलाई बिशेष सुविधा, भिडभाडबाट बच्ने उत्तम मौका

काठमाडाैं । के तपाई राष्ट्रिय परिचयपत्र बनाउन जाने सोचमा हुनुहुन्छ ? के त पाईलाई राष्ट्रिय परिचयपत्र बनाउन के के कागजात चाहिन्छन् भन्ने थाहा छ ?

सरकारले विद्युतीय राहदानी अर्थात ई-पासपोर्ट बनाउन राष्ट्रिय परिचयपत्र नम्बर अनिवार्य गरेसँगै राष्ट्रिय परिचयपत्र बनाउनेको भिड बढ्दो छ । भिडभाडका कारण झेल्नु पर्ने हैरानीका कारण असहज महशुस गर्नु भएको त छैन ?

तपाईको असहजका लागि सहज बनाउन नेपाल सरकार गृह मन्त्रालयको राष्ट्रिय परिचयपत्र तथा पञ्जीकरण विभागको स्टलमा राष्ट्रिय परिचयपत्र बनाउनेहरुको लागि बिशेष व्यवस्था गरेको छ । त्यो पनि यही माघ २८ गतेसम्म काठमाडौंको भृकुटीमण्डपस्थित प्रदर्शनी हलमा ३०औं संस्करणको ‘क्यान इन्फोटेक २०२५’ मा गएर यो सेवाको भरपुर सदुपयोग लिन सकिने छ ।

राष्ट्रिय परिचयपत्र तथा पञ्जीकरण विभागको टोलीले क्यान इन्फोटेकमा छुट्टै दर्ता स्टेसन सञ्चालन गरी यो सेवा सञ्चालनमा ल्याएको हो । दर्ता स्टेसनमा सेवाग्राहीले आफ्नो वैयक्तिक तथा जैविक विवरण दर्ता गराएपछि तत्कालै राष्ट्रिय परिचयपत्र नम्बर प्राप्त गर्न सक्नेछन् ।

क्यान महासंघका उपाध्यक्ष चिरन्जिवी अधिकारीका अनुसार काठमाडौंमा रहेका नेपालका जुनसुकै जिल्लाका नागरिकले क्यान इन्फोटेकमा आई राष्ट्रिय परिचय पत्रका लागि बायोमेट्रिक अथेन्टिकेसन लिन सक्नेछन् ।

कसरी लिने सेवा ?

राष्ट्रिय परिचयपत्र तथा पञ्जीकरण विभागका (प्रशासन, योजना अनुगमन तथा समन्वय शाखा)का निर्देशक शिवराज सेढाई अनुसार सहज तरिकाले परिचय पत्र बनाउनका लागि आफैले राष्ट्रिय परिचयपत्रको अनलाइन फारम भरेर क्यान मेलामा पुग्ने सेवाग्राहीले आफ्नो वैयक्तिक तथा जैविक विवरण दर्ता गराएपछि तत्कालै राष्ट्रिय परिचयपत्र नम्बर प्राप्त गर्न सक्नेछन् । अनलाइन फारम भरेका नेपालका जुनसुकै जिल्लाका नागरिकले क्यान इन्फोटेकमा पुगेर राष्ट्रिय परिचयपत्रका लागि बायोमेट्रिक दिन सक्नेछन् ।

के के चाहिन्छ ?

१. नेपाली नागरिकताको सक्कल प्रमाणपत्र ।
२. नागरिकतामा जन्ममिति नखुलेकाको हकमा जन्ममिति खुल्ने प्रमाण ।
३. नागरिकका प्रमाणपत्रमा उल्लेख भएको भन्दा फरक ठेगाना भएमा ठेगाना प्रमाणित गर्ने बसाईसराई वा बसोबास प्रमाणपत्र भएको कागज ।
४. नागरिकतामा पति/पत्नी नखुलेको हकमा विवाह दर्ता प्रमाणपत्र वा बच्चाको जन्मदर्ता प्रमाणपत्र वा पति पत्नी भएको प्रमाणित हुने कागज ।
५. नागरिकतामा अग्रेजीमा नामथर नभएमा भरसक अग्रेजी नामथर खुल्ने कागजात ।
६. राहदानी हुनेले राहादानी साथमै लिएर गएको राम्रो अग्रेजी नामथर प्रस्ट बनाउने सहयोगी बन्ने छ ।
७. विवरण पुष्टी गर्ने अन्य कागजातहरु आवश्यकता अनुसार जस्तै मृत्यु दर्ता, सम्बन्ध विच्छेद आदी ।

क्यान इन्फोटेकमा सर्वसाधारणका लागि टिकट शुल्क १०० रुपैयाँ र विद्यार्थीका लागि ५० रुपैयाँ तोकिएको छ; ज्येष्ठ नागरिक, फरक क्षमताका नागरिक, १० वर्षमुनिका बालबालिका तथा सरकारी र सामुदायिक विद्यालयको सिफारिशमा सामूहिक अवलोकन निःशुल्क हुनेछ ।