हरायो क्यान इन्फोटेकको रौनकता : तामझामका साथ मेला लाग्ने ठाउँ सुनसान « Devoted for Economic Devlopment, आर्थिक विकासको लागि समर्पित

प्रविधी

हरायो क्यान इन्फोटेकको रौनकता : तामझामका साथ मेला लाग्ने ठाउँ सुनसान



काठमाडौं। कम्प्युटर एसोसिएसन नेपाल महासंघ (क्यान महासंघ)को आयोजनामा ‘एचएमसी नेपाल हिक्सेमी क्यान इन्फोटेक २०२५’ हिजोदेखि सुरु भएको छ। राजधानीको भृकुटीमण्डपस्थित प्रदर्शनी हलमा आयोजना भएको यो ३०औं संस्करण पाँच दिनसम्म सञ्चालन हुनेछ।

तर, प्रविधि क्षेत्रको कुम्भ मेला भनेर चिनिने क्यान इन्फोटेक यस वर्ष अपेक्षाकृत उत्साह देखिएन। विगतका वर्षहरूमा ठूलो संख्यामा अवलोकनकर्ता र प्रविधिप्रेमीहरू आकर्षित गर्ने मेला यो वर्ष सुनसान देखिएको छ।

औपचारिक उद्घाटन, तर सहभागिता न्यून

सञ्चार तथा सूचना प्रविधिमन्त्री पृथ्वीसुब्बा गुरुङले बिहीबार एआई रोबोटको सहयोगमा डिजिटल दियो बालेर मेलाको औपचारिक उद्घाटन गरे। प्रधानमन्त्री केपी शर्मा ओलीले पनि भिडियो सन्देशमार्फत क्यान इन्फोटेक २०२५ को सफलताको शुभकामना व्यक्त गरे। केही उद्योगी नेताहरूले प्रविधिमा लगानीको महत्वबारे चर्चा गरे।

सरकारले सूचना प्रविधि उद्योगमैत्री कार्यक्रम सञ्चालन, नवप्रवर्तन तथा स्टार्टअप संस्कृतिको विकास, स्वदेशी सीप र कलाको प्रोत्साहन, प्राविधिक जनशक्ति उत्पादन र परिचालनमार्फत देशको अर्थतन्त्र सुदृढ बनाउने प्रतिबद्धता जनाएको छ। क्यानका महासचिव चन्द्रबिलास भुर्तेलले ३०औँ संस्करणको उद्घाटनको पहिलो दिनमा नै २० हजारले अवलोकन गरिसकेको र ५औँ दिनसम्ममा ३ लाखले अवलोकन गर्नै अपेक्षा रहेको बताएका थिए । तर, मेलाको पहिलो दिन अपेक्षित सहभागिता देखिएन।

कम्पनीहरू निराश

विगतमा क्यान इन्फोटेक प्रविधि कम्पनीहरूका लागि आफ्ना सेवा तथा उत्पादनको प्रवर्द्धन गर्ने प्रमुख मञ्च थियो। विशेष अफर तथा नयाँ योजनाहरू ल्याएर उपभोक्ताहरूलाई आकर्षित गरिन्थ्यो। तर, यस वर्ष मेलाको पहिलो र दोस्रो दिन नै अवलोकनकर्ता न्यून देखिएपछि प्रदर्शनीकर्ता कम्पनीहरू निराश देखिएका छन्।

क्यान इन्फोटेकको घट्दो आकर्षण प्रविधिमा आएको परिवर्तन, अनलाइन प्रविधिको विस्तार तथा आयोजकीय कमजोरीका कारण हुन सक्ने बताइन्छ। प्रविधिप्रेमीहरूको उत्साह घट्नुको कारणबारे आयोजकहरूले पुनर्विचार गर्नुपर्ने देखिन्छ। तर यता आयोजक भने नयाँ टिम र चुनावी कार्यक्रमका कारण पनि मेलालाई प्रभावकारी बनाउन नसकिएको बताएका छन् ।

प्रकाशित : २५ माघ २०८१, शुक्रबार १४:५४