नागरिक लगानी कोषकाे खुद नाफा ३१.७८ प्रतिशतले बढ्याे ?

काठमाडौं । चालु आर्थिक वर्षको दोस्रो त्रैमाससम्ममा नागरिक लगानी कोषले ५१ करोड ३२ लाख रुपैयाँ खुद नाफा कमाएको छ। जुन गत वर्षको यसै अवधिको तुलनामा ३१.७८ प्रतिशत धेरै हो ।

गत आर्थिक वर्षको सोही अवधिमा कोषले ३८ करोड ९४ लाख ६० हजार रुपैयाँ खुद नाफा आर्जन गरेको थियो । बैंक तथा वित्तीय संस्थाहरुको ब्याजदर उच्च भएकाले कोषको नाफा बढेको छ । कोषले मुद्दती निक्षेपमा लगानी गरेको ब्याज आम्दानी बढ्न गएकाले नाफा बढेको हो ।

ब्याज आम्दानी ८ करोड ८७ लाख रुपैयाँबाट बढेर २१ करोड २४ लाख रुपैयाँ पुगेको छ । यस्तै, सेवा शुल्क तथा कमिसन आम्दानी ५८ करोड रुपैयाँबाट बढेर ६१ करोड रुपैयाँ पुगेको छ । हाल नागरिक लगानी कोषको सेयर पुँजीमा ४ अर्ब २५ करोड १० लाख रुपैयाँ रहेको छ ।

सेयर प्रिमियम भने गत वर्षको भन्दा घटेर २८ करोड ३८ लाख ७८ हजार रुपैयाँमा आएको छ । गत वर्ष सेयर प्रिमियम १ अर्ब २६ करोड ४८ लाख रुपैयाँ रहेको थियो ।

यसको जगेडा कोष भने १९ अर्ब रुपैयाँबाट घटेर १५ अर्बमा झरेको छ । मुद्दति निक्षेपमा १ खर्ब ६ अर्ब २६ करोड रुपैयाँ लगानी गरेको छ । संगठित संस्थाको सेयर तथा धितोपत्रमा लगानी बढाएर २८ अर्ब २६ करोड रुपैयाँ पुर्याएको छ । गत वर्ष भने सेयरमा १६ अर्ब ७३ करोड रुपैयाँ मात्र लगानी गरेको थियो ।

लगानीमा प्रतिफल (आरओआई) पनि ७.८२ प्रतिशतबाट बढेर ९.४२ प्रतिशत पुगेको छ । पुस मसान्तसम्म आइपुग्दा सीआइटीको प्रतिसेयर आम्दानी २३ रुपैयाँ ८२ पैसाबाट बढेर २४ रुपैयाँ १५ पैसा कायम भएको छ । यसको प्रतिसेयर नेटवर्थ भने १९५ रुपैयाँ ६५ पैसा छ ।