प्रचण्डलाई विश्वासको मत दिएर गल्ती गर्‍यौं : शेखर कोइराला

काठमाडौं । नेपाली कांग्रेसका नेता शेखर कोइरालाले प्रधानमन्त्री पुष्पकमल दाहाल प्रचण्डलाई विश्वासको मत दिएर गल्ती गरेको बताएका छन् ।

संस्थापनइतर पक्षका नेताहरूसँगको जारी बैठकलाई सम्बोधन गर्दै नेता कोइरालाले विश्वासको मत दिएर पार्टीले गल्ती गरेको बताएका हुन् ।

आफूले तटस्थ बसौ भनेर प्रस्ताव राखेको तर सुनुवाइ नै नगरी बहुमतले निर्णय गरेर प्रधानमन्त्रीलाई विश्वासको मत दिइएको उनको भनाइ छ ।

काठमाडौंको बत्तीसपुतलीस्थित अनुपम फुडल्यान्डमा सो समूहको बैठक सुरु भएको छ ।

बैठकमा यही माघ १५ गतेदेखि सुरु हुने पार्टीको केन्द्रीय कार्यसमितिको बैठकका बारेमा छलफल गरिनेछ । त्यसमा आफ्नो समूह कसरी प्रस्तुत हुने भन्ने विषयमा विचारविमर्श गरिनेछ ।

छलफलमा सो समूहमा रहेका कांग्रेस केन्द्रीय पदाधिकारी, केन्द्रीय सदस्य, सांसद र प्रदेश सभापतिहरू सहभागी छन् । पछिल्लो राजनीतिक घटनाक्रमका बारेमा पनि छलफल गरिने डा. कोइरालाको सचिवालयले जनाएको छ ।