पुराना प्रभावकारी कार्यक्रमहरुलाई नेफ्स्कूनले निरन्तरता दिनुपर्छ « Devoted for Economic Devlopment, आर्थिक विकासको लागि समर्पित
३ मंसिर २०८३, बिहिबारThursday, November 19, 2026

बिशेष

पुराना प्रभावकारी कार्यक्रमहरुलाई नेफ्स्कूनले निरन्तरता दिनुपर्छ

यो समाचार सुन्नुहोस्अडियो तयार हुँदैछ, केही मिनेटपछि फेरि हेर्नुहोस्

यतिबेला बचत तथा ऋण सहकारी अभियानप्रति चौतर्फी आक्रमण भइरहेको छ । अभियान नै संवेदनशील अवस्थामा छ । जवान भइसकेकोे नेफ्स्कुनले यस्ता विविध विषयमा भूमिका खेल्नुपर्ने जिम्मेवारी आइपरेको छ । अग्रज अभियन्ताहरुले नेफ्स्कुनलाई यहाँसम्म ल्याउनुभएकाले यसको अभियानलाई जोगाउन र अघि बढाउन शसक्त भूमिका खेल्नुपर्ने दायित्व छ । नेफ्स्कुनको उद्देश्य भनेको दुर दराजमा संस्था विस्तार गर्ने र प्रोत्साहन गर्ने हो । यसमा कतिको काम भएको छ समीक्षा गर्नु जरुरी भइसकेको छ । अभियानले दुर दराजका जनतालाई बचत गर्ने बानीको विकास गराउने, पूँजी निर्माण गर्ने र गरिबी निवारण गर्ने काममा अहम भूमिका खेलेको छ । यसलाई निरन्तरता दिनुपर्ने बाध्यता छ । कतिपयले यस अभियानलाई बैंकसँग तुलना गरेका छन् । यो विल्कुल होइन ।

पछिल्लो समय सहकारीहरुले खराब काम गरे, डुबाए, राम्रो काम गरेन भन्ने किसिमका समाचार आइरहेका छन् । यसमा पत्रकारहरुले पनि नबुझेको हो कि भन्ने लाग्छ । सकरात्मक सोचको अभाव देख्छु । सकरात्मक सोचको विकास गराउनका लागि पत्रकारहरुलाई अभिमूखिकरणको आवश्यक्ता देख्छु । किनकी अभियानका विषयमा गलत प्रचार गर्ने प्रबृत्तिको अन्त्य गर्नुपर्छ । हुनत पत्रकारलाई र मिडियालाई मात्र दोष दिन मिल्दैन । सकरात्मक सन्देश पनि प्रवाह गरेका छन् तर धेरै चाहीं नकरात्मक सन्देश प्रवाह भयो भन्ने मात्र हो । यसका लागि नेफ्स्कुन बोर्ड र व्यवस्थापन टिम साथै अभियन्ताहरुले पनि आफ्नो कार्यशैलीमा सुधार गर्नुपर्ने देखिन्छ । अहिलेको अवस्था भनेको अन्यन्तै तरल अवस्था रहेकाले धेरै विवेक पुर्याएर काम गर्नुपर्ने देखिन्छ ।
देशको संरचना बदलिरहेको अवस्थामा काम गर्न केही समस्याहरु अवश्य छन् । कानूनी वा नीतिगत जटिलताहरु छन् । तर नेफ्स्कुन बोर्डका साथीहरुले त्यति प्रभावकारी रुपमा काम गर्न नसकेको हो कि जस्तो लाग्छ । अग्रज वा पूर्वजहरुसँग राय सल्लाह लिएर काम गर्दा उत्तम हुन्छ जस्तो लाग्छ । बोर्डमा रहेका साथीहरुले समय दिइरहनु भएको देखिन्छ, अध्यक्ष पनि खटिरहेको देखन्छ तर उत्ति संवेदनशील भए जस्तो लाग्दैन । सहयोग र सुझावहरुलाई उहाँहरुले मार्गदर्शनका रुपमा लिनुपर्ने देखिन्छ ।

स्थीरिकरण कोषकै विषयमा पनि धेरै काम गर्नुपर्ने देखिन्छ । यसको महत्व अन्यन्तै ठूलो छ । संस्थाहरु समस्यामा नपरोस, वित्तिय संकटमा नपरोस भनेर कोष स्थापना भएको हो । सरकारले यसलाई नीतिगत रुपमा सहयोग गर्न र स्वीकृती दिनलाई धेरै अल्झनहरु झिकेको थियो । हामीले जुन उद्देश्य अनुरुप कोष स्थापना गरेका थियौं तर सरकारले त्यसको मोडेल नै परिवर्तन गरिदियो । सरकारले जबरजस्ती अभियानको माग भन्दा फरक भूमिका खेल्यो । बोर्डमा पनि हामीले भनेजस्तो काम गरेन ।

विदेशतिर नेफ्स्कूनको बोर्डलाई नै जिम्मेवारी दिएको हुन्छ तर नेपालमा त्यस्तो देखिएन । तथापी, बोर्डमा नेफ्स्कुनकै साथीहरुको भूमिका प्रभावकारी रहन्छ जस्तो लाग्छ । अध्यक्ष वा सदस्य सचिबमा नेफ्स्कुनले नै अगुवाइ गर्न पाउँछन् । हालैमात्र मन्त्रालयले स्वीकृति दिएको छ । यो खुशीको कुरा हो । बोर्डले पनि पूर्णता पाएको छ । अब कोषमा पैसा जम्मा गर्ने संस्थाहरुका लागि हामीसँग लिक्युडिटीको पैसा छ है डराउनु पर्दैन भन्ने सन्देश प्रवाह गर्न नेफ्स्कुनले डराउनु पर्दैन ।

पुँजी परिचालन गर्ने सवालमा पनि नियम अनुसार काम नगर्ने, फेडरेशनको रुल्स वा स्कुलिङ अनुसार काम नगर्नेलाई सरकारले कारवाही गर्न सकिरहेको छैन । त्यसले गर्दा राम्रा संस्था र नियममै रहेका संस्थाहरुलाई समस्या भइरहेको छ । तर राम्रा संस्थाहरुलाई पनि व्यवहारिक जटीलता देखिएका छन् । लाइन लागेर पैसा लिन आउनेलाई दिनुपर्ने बाध्यता आए २० प्रतिशत मात्र दिन सक्लान । अरु पैसा त लोनमा गइसकेको हुन्छ । पैसा दिन नसकेको खण्डमा नकरात्मक सन्देश प्रवाह हुनसक्छ । यसमा सचेत हुनु जरुरी छ । यीनिहरुलाई नेफ्स्कुन र सहकारी बैंकले जोगाउनुपर्छ । अनुगमन गरेर समस्या भए नभएको पत्ता लगाउने र समाधानको बाटो पहिल्याइदिनुपर्छ । सहकारीहरुलाई सिस्टममा राखेर चलाउन सक्नुपर्छ । टु टायर सिष्टममा राख्न सके कोरिया र क्यानाडाको जस्तो उदाहरणीय बन्न सकिन्छ । यद्यपी, बेइमान गर्नेहरुलाई कारवाही गर्नैपर्छ । नेफ्स्कूनले बेइमानहरुलाई जोगाउनु हुँदैन । राम्रालाई सहयोग गरेरै जानुपर्छ ।

हुनत मेरो भन्दा अघिल्लो कार्यकालमा संस्थालाई चाहिने नियम–नियमावली बनाउने वा नेटवर्क विस्तार गर्ने काम भइसकेको थियो । तर मेरो कार्यकालमा त्यसलाई कार्यान्वयनमा ल्याएर दुई अर्बको ब्यालेस सिटलाई बढाएर १६ अर्ब बनाउँदा खुबै उत्साहित बनाएको थियो । कर्मचारीको संख्या बृद्धि, शाखा विस्तार, सदस्य संख्या बृद्धि, शुसासनमा लैजान सोही अनुसारको मोडेल बनाउनेदेखि सरकारसँग सम्बन्ध विस्तार गरेर योजनाबद्ध रुपमा काम गरेको अनुभव छ । एकीकरण कोषको नियमावली स्वीकृत गराउने र विदेशी संस्थासँगको सहकार्यलाई मजवुद बनाएको अनुभव मेरो पनि छ ।

बार्षिक अभिमूखिकरण कार्यक्रम संचालन गर्नका लागि भनेर धुलीखेलमा तालिम केन्द्र स्थापना गर्ने योजनालाई प्राथमिकता नदिनु दुर्भाग्यपूर्ण छ । स्तरीकरणको कार्यक्रम र सरकारसँगको साझेदारी कार्यक्रम प्रभावकारी भएको देखिदैन । मोडेल जिल्ला घोषणा गर्ने देखि मेम्बर इन्फरमेशन सिस्टम सुस्ताएको देखिन्छ । यद्यपी, केही नयाँ कामहरु अहिलेको बोर्डले जोडेको छ । स्थानीय तहसँगको साझेदारी कार्यक्रम राम्रो भएको देखिन्छ । राजनीतिकरणबाट संघलाई जोगाउनुपर्ने दायित्व पनि अहिलेको टिमलाई आइपरेको छ । (कुराकानीमा आधारित)

प्रकाशित : ३१ श्रावण २०७९, मंगलबार ०८:३० 16 August, 2022 8:30 am

प्रतिक्रिया

तपाईंको प्रतिक्रिया लेख्नुहोस्

तपाईंको इमेल प्रकाशित हुने छैन। प्रतिक्रिया स्वीकृत भएपछि देखिनेछ।