आज खण्डग्रास चन्द्रग्रहण, यी राशीलाई शुभ

काठमाडौं । मंगलबार मध्यरातदेखि खण्डग्रास चन्द्रग्रहण लाग्ने भएको छ । मध्यरातमा शुरु हुने ग्रहण ३ घन्टाभन्दा बढीको हुनेछ । सूर्य, पृथ्वी र चन्द्रमा सिधा रेखामा परेको समयमा पृथ्वीको छाँया चन्द्रमामा पर्ने भएकाले खण्डग्रास ग्रहण लाग्ने गर्छ । नेपाली समय अनुसार राति १ बजेर ४७ मिनेटबाट शुरु हुने ग्रहण बुधबार विहान ४ बजेर ४५ मिनेटमा अन्त्य हुनेछ ।

यो ग्रहण नेपालसहित भारत, चीन, मंगोलिया, अफ्रिका, दक्षिण अमेरिका, जापान, यूरोप, रसिया, अष्ट्रेलिया आसपासका मुलुकबाट प्रष्टै देखिने छ ।खगोलविद्हरुका अनुसार यो अवधिमा चन्द्रमाको आधाभन्दा भन्दा बढी भाग छोपिएको अवस्थामा देखिनेछ । तर, क्यानडा र उत्तर अमेरिकामा बसोवास गर्नेहरुले भने यो ग्रहणको अनुभव लिन पाउने छैनन् । यसपटकको चन्द्रग्रहणमा कर्कट, तुला, कुम्भ तथा मीन राशी भएकाहरुलाई शुभ मानिएकाले यी राशी भएकाले ग्रहण हेर्न हुने बताइएको छ । तर, मेष, वृष, मिथुन, सिंह, कन्या, वृश्चिक, धनु, मकर राशि भएकालाई भने यो ग्रहण नियाल्न नहुने ज्योतिषशास्त्रीहरुको भनाइ छ ।