योजना बनाएर ल्याउनुस घर घरमा उद्योग पु¥याउने जिम्मा सरकारको भयो ः मन्त्री यादव

काठमाडौँ । उद्योग, वाणिज्य तथा आपूर्ति मन्त्री मात्रिकाप्रसाद यादवले स्वदेशमा उत्पादित वस्तुलाई प्रोत्साहन गरेमात्र देश विकास हुने बताएका छन् ।

नेपाल घरेलु तथा साना उद्योग महासंघको २४औँ साधारणसभा तथा २१औँ राष्ट्रिय महिला उद्योगी सम्मेलनका क्रममा सोमबार आयोजित कार्यक्रममा उनले मुलुकको विकास नै यो सरकारको प्रमुख प्राथमिकता भएको बताए । “अबको राजनीतिक देश समृद्धतर्फ लैजाने हुनेछ”, उनले भने ।

मन्त्री यादवले सरकारले निजी क्षेत्रमा गर्नुपर्ने कामबारे योजना बनाएर ल्याउन आग्रहसमेत गरे । उद्योग मन्त्रालय सबैसँग हातेमालो गरेर अगाडि बढ्न चाहेको उनको भनाइ थियो । “मिडिया क्षेत्रमा समेत अनुगमन हुन्छ, अपराध गर्ने जो कोहीलाई कारबाहीको घेरामा ल्याइन्छ”, उनले भने ।

उनले उद्योग क्षेत्र मुलुकको आर्थिक विकासको मुख्य आधार भएको भन्दै सरकार घर घरमा उद्योग पु¥याउने प्रतिबद्धताअनुसार अगाडि बढेको स्पष्ट पार्नुभयो ।

महासंघका अध्यक्ष श्यामप्रसाद गिरीले देश विकासको मुख्य आधार नै साना तथा घरेलु उद्योग भएकाले उक्त क्षेत्रको विकासका लागि सरकारले सहयोग गर्नुपर्ने बताए। उनले अर्थतन्त्रका आधारभूत क्षेत्रहरु कृषि, वन, खनिज, पर्यटन, जलस्रोत क्षेत्रलाई अधिकतम प्रयोग गर्न सकेमात्र मुलुक विकास हुने भन्दै सरकारले उक्त क्षेत्रलाई प्राथमिकता दिनुपर्नेमा जोड दिए ।

सम्मेलनमा घरेलु तथा साना उद्योगमार्फत महिलालाई कसरी अगाडि बढाउन सकिन्छ भन्नेबारेमा गहन छलफल हुने महासंघका महासचिव डम्बरप्रसाद रेग्मीले जानकारी दिए।