एकीकृत नमूना दलित बस्ती राष्ट्रपतिबाट हस्तान्तरण

रौतहट। धुर्मुस सुन्तली फाउण्डेशनले निर्माण गरेको सन्तपुर एकीकृत नमूना दलित बस्तीको हस्तान्तरण राष्ट्रपति विद्यादेवी भण्डारीले गरेकी छिन् । मंगलबार एक समारोहकाबीच उक्त साँचो दलित बस्तीलाई हस्तान्तरण गरिएको हो ।

हस्तान्तरण कार्यक्रममा बोल्दै राष्ट्रपति भण्डारीले कलाकारद्वय धुर्मुस–सुन्तलीले समुदायको विकासका लागि अतुलनीय काम गरेको बताइन् । साथै उनले देशलाई समृद्ध बनाउने काम सरकारको भए पनि धुर्मुस–सुन्तलीले राज्यले गर्नुपर्ने काम गरेको कुरा उल्लेख गरिन् ।

कार्यक्रममा राष्ट्रिय पुनःनिर्माण प्राधिकरणका कार्यकारी निर्देशक युवराज भुसाल, हास्य कलाकार महजोडी लगायत अन्यको उपस्थिति रहेको थियो ।

कट्टेल र कुञ्जना घिमिरेद्वयको पहलमा सन्तपुरमा बाढीपीडित दलित परिवारका लागि भूकम्प प्रतिरोधात्मक सुविधासम्पन्न ४७ घर निर्माण भएको छ । उक्त नमूना बस्तीमा सामुदायिक भवन, मन्दिर, क्लब, दृश्यावलोकनस्तम्भ निर्माण भएका छन् । करिब ५ करोड २४ लाखको लागतमा बस्ती निर्माण भएको हो ।