शुभप्रवा सहकारीको कारोबार १७.४८ प्रतिशतले बढ्यो, १ अर्ब १७ करोड नाघ्यो

काठमाडौं । चुनौतीपूर्ण आर्थिक वातावरणका बीच शुभप्रवा बचत तथा ऋण सहकारी संस्था लिमिटेडले आफ्नो वित्तीय कारोबार विस्तार गरेको छ। चावहिलमा प्रधान कार्यालय रहेको संस्थाको १७औँ वार्षिक साधारण सभामा प्रस्तुत प्रतिवेदनअनुसार आर्थिक वर्ष २०८२/०८३ मा संस्थाको कुल सम्पत्ति तथा दायित्व १७.४८ प्रतिशतले वृद्धि भई १ अर्ब १७ करोड ७ लाख २१ हजार रुपैयाँ पुगेको छ।

संस्थाका अध्यक्ष विदुर बस्नेतको सभापतित्वमा असोज २५ गते सम्पन्न साधारण सभामा प्रमुख कार्यकारी निर्देशक फडिन्द्रकुमार खड्काले आर्थिक वर्ष २०८२/०८३ को सञ्चालक समितिको प्रतिवेदन, वित्तीय विवरण तथा आगामी आर्थिक वर्ष २०८३/०८४ को रणनीति प्रस्तुत गरेका थिए। सभाको सञ्चालन सहायक प्रबन्धक दीपक पुडासैनीले गरेका थिए।

प्रमुख कार्यकारी निर्देशक खड्काले सहकारी क्षेत्रमा विभिन्न चुनौती र समस्या देखिए पनि सदस्यहरूको निरन्तर विश्वासका कारण संस्थाले वित्तीय सूचकमा सकारात्मक प्रगति हासिल गरेको बताए। उनका अनुसार अघिल्लो आर्थिक वर्षको तुलनामा शेयर पुँजी, निक्षेप सङ्कलन, कर्जा लगानी र कुल कारोबारमा वृद्धि भएको छ।

निक्षेप ८८ करोड, कर्जा लगानी ७४ करोड रुपैयाँभन्दा बढी
साधारण सभामा प्रस्तुत प्रतिवेदनअनुसार समीक्षा अवधिमा संस्थाको शेयर पुँजी ६.०३ प्रतिशतले वृद्धि भई १० करोड ७८ लाख ७२ हजार रुपैयाँ पुगेको छ। त्यस्तै, कुल निक्षेप १८.६४ प्रतिशतले बढेर ८८ करोड ४ लाख ७९ हजार रुपैयाँ कायम भएको छ।
संस्थाको कर्जा लगानी १७.८१ प्रतिशतले वृद्धि भई ७४ करोड ५६ लाख ७३ हजार रुपैयाँ पुगेको प्रतिवेदनमा उल्लेख छ। यी सूचकले संस्थाको वित्तीय कारोबार विस्तार भएको देखाए पनि कर्जा मागमा कमी र लगानीयोग्य रकमको व्यवस्थापन संस्थाका लागि चुनौती बनेको छ।

खड्काका अनुसार बजारमा कर्जाको माग अपेक्षाकृत नहुँदा ठूलो रकम बैंकमा ब्याज नआउने गरी राख्नुपरेको छ। साथै, कर्जाको ब्याज असुलीमा लचिलो नीति अपनाउनुपरेकाले अपेक्षाअनुसार नाफा आर्जन हुन नसकेको उनले बताए।

आम्दानी ९ करोड ८२ लाख, सञ्चालन मुनाफा १७ लाख
प्रतिवेदनअनुसार आर्थिक वर्ष २०८२/०८३ मा संस्थाले ९ करोड ८२ लाख ७१ हजार रुपैयाँ कुल आम्दानी गरेको छ। सोही अवधिमा कुल खर्च ९ करोड ६५ लाख ५२ हजार रुपैयाँ रहेको छ। यस आधारमा संस्थाको सञ्चालन मुनाफा १७ लाख १९ हजार रुपैयाँ कायम भएको छ।

त्यस्तै, संस्थाको कोष व्यवस्था ६.११ प्रतिशतले वृद्धि भई ८ करोड ३ लाख २१ हजार रुपैयाँ पुगेको छ। कुल कारोबार र निक्षेपमा उल्लेख्य वृद्धि भए पनि सञ्चालन मुनाफा भने तुलनात्मक रूपमा न्यून देखिएको छ। कर्जा मागको अवस्था, बैंकमा रहेको निर्व्याजी रकम र ब्याज असुली नीतिले नाफामा प्रभाव पारेको संस्थाले जनाएको छ।

डिजिटल सेवालाई प्राथमिकता
संस्थाले पछिल्ला छ वर्षदेखि डिजिटल कारोबारलाई प्राथमिकता दिँदै आएको प्रमुख कार्यकारी निर्देशक खड्काले बताए। संस्थाले ‘शुभप्रवा स्मार्ट एप’ मार्फत खानेपानी, बिजुली, हवाई टिकट, इन्टरनेट, टेलिभिजन तथा बीमाको भुक्तानी, बैंक खातामा रकम स्थानान्तरण र क्यूआर भुक्तानीलगायत सेवा उपलब्ध गराउँदै आएको छ।

त्यस्तै, कनेक्ट आईपीएसमार्फत २४ सै घण्टा शुभप्रवाका खातामा एक करोड रुपैयाँसम्म वास्तविक समयमा रकम स्थानान्तरण गर्न सकिने सुविधा रहेको उनले जानकारी दिए। डिजिटल सेवाको विस्तारले सदस्यलाई वित्तीय कारोबार सहज बनाउनुका साथै संस्थाको सेवा प्रवाहलाई प्रविधिमैत्री बनाएको उनको भनाइ छ।

बाढीपीडितलाई सहयोग, विद्यार्थी सम्मान कार्यक्रम सुरु
संस्थाले संस्थागत सामाजिक उत्तरदायित्वअन्तर्गत भोटेकोशीका बाढीपीडितलाई राहत उपलब्ध गराउन प्रधानमन्त्री दैवी प्रकोप उद्धार कोषमा १ लाख १५ हजार ५ सय रुपैयाँ सहयोग हस्तान्तरण गरेको जनाएको छ।

यसै वर्षदेखि सदस्यका छोराछोरीमध्ये माध्यमिक शिक्षा परीक्षा (एसईई) मा सर्वोत्कृष्ट अङ्क हासिल गर्ने एक छात्र र एक छात्रालाई नगद पुरस्कार तथा सम्मानपत्र प्रदान गर्ने कार्यक्रमसमेत सुरु गरिएको खड्काले जानकारी दिए। सदस्यको आर्थिक हितसँगै सामाजिक उत्तरदायित्व, प्रविधिको प्रयोग र नयाँ पुस्तालाई प्रोत्साहन गर्ने कार्यक्रमलाई अघि बढाउँदै संस्थाले आगामी आर्थिक वर्षका लागि रणनीति प्रस्तुत गरेको छ।