रुपन्देहीको जनउत्थान साकोसलाई एक्सेस ब्राण्ड

एसियाली ऋण महासंघ (अक्कु) ले सञ्चालन गरेको एक्सेस ब्राण्ड यो वर्ष पनि रुपन्देहीको जनउत्थान बचत तथा ऋण सहकारी संस्थाले मात्र पाएको छ । संस्थाले यो बर्ष सिल्भर ब्राण्ड प्राप्त गरेको छ । गत वर्ष पनि नेपालबाट जनउत्थान सहकारी संस्थाले मात्रै एक्सेस ब्रोञ्च पाएको थियो । ब्राण्ड एक वर्षकोलागि मात्र मानिनेछ ।

अकुको प्राविधिक सहयोगमा नेफस्कूनद्वारा प्रवद्धित कार्यक्रममा यस अघि नेपालका २० भन्दा बढी सहकारी संस्था एक्सेस ब्राण्डमा सहभागि थिए । जनउत्थान सहकारी संस्थाका प्रमुख कार्यकारी अधिकृत रनबहादुर थापाले यो वर्ष जनउत्थान साकोसले सिल्भर ब्राण्ड प्राप्त गरेको जानकारी दिए ।

३९ हजार २३७ जना सदस्यलाई वित्तीय सेवा प्रदान गर्दै आएको उक्त संस्था मूलुककै एक उत्कृष्ट संस्थाको रुपमा स्थापित भएको छ । सदस्य र समुदाय केन्द्रीय वित्तीय सेवाप्रवाह गर्दै आएको संस्थाले सदस्यहरुको आर्थिक तथा सामाजिक रुपान्तरणमा समेत उल्लेख योगदान पुर्याएको छ ।

संस्थागत पुँजीलाई प्राथमिकतामा राखेर अगाडि बढेको संस्थामा जगेडा कोषमा मात्रै ४० करोड ४७ लाख १५ हजार पुगेको छ । त्यसैगरी असार मसान्तसम्मको विवरण अनुसार संस्थाको कूल सम्पति ४ अर्ब ४४ करोड ६४ लाख ५७ हजार रहेको प्रमुख कार्यकारी अधिकृत थापाले जानकारी दिए ।

संस्थाको सेयर पूँजी २८ करोड ४३ लाख ९४ हजार ९०० रुपैंयाँ तथा कर्जा जोखिम कोषमा १२ करोड ५० लाख ५९ हजार रहेको जनाइएको छ । ३ अर्ब ४४ करोड ९९ लाख २५ हजार बचत संकलन तथा ३ अर्ब ३३ करोड ४१ लाख ९५ हजार ऋण लगानीमा रहेको जनाएको छ । संस्थामा १० हजार ८९१ जना ऋणी सदस्य रहेका छन् । संस्थाले आर्थिक वर्ष ०८१ ०८२ मा २ करोड ५३ लाख ८८ हजार ३९६ रुपैंयाँ राज्य कोषमा योगदान गरेको जनाएको छ ।