सन नेपाल लाइफ इन्स्योरेन्सकाे नाफा ४९ करोड ३६ लाख, खुद बिमा शुल्क आर्जन दुई अर्ब ४९ करोड

काठमाडौं । सन नेपाल लाइफ इन्स्योरेन्सले चालु आर्थिक वर्षको तेस्रो त्रैमाससम्म ४९ करोड ३६ लाख रुपैयाँ खुद नाफा कमाएको छ । गत वर्ष यसले ४४ करोड ४५ लाख रुपैयाँ नाफा आर्जन गरेको थियो ।

कम्पनीको लगानी तथा कर्जाबाट हुने आम्दानी बढेर ६५ करोड २३ लाख रुपैयाँ पुगेपछि खुद नाफामा सुधार भएको हो । गत वर्ष यसले लगानी तथा कर्जाबाट ४० करोड ६२ लाख रुपैयाँ आम्दानी गरेको थियो । साथै, यसको कुल दाबी भुक्तानी रकम पनि एम अर्ब १५ करोड २८ लाख रुपैयाँबाट घटेर ८५ करोड ३४ लाख रुपैयाँमा आएको छ ।

हाल यस इन्स्योरेन्सको चुक्ता पुँजी तीन अर्ब २० करोड रुपैयाँ रहेको छ । यसको रिटेन्ड अर्निङमा एक अर्ब २३ करोड ४१ लाख रुपैयाँ रहेको छ । सन नेपालको सेयर प्रिमियममा एक अर्ब २६ करोड ७६ लाख रहेको छ ।

चैत मसान्तसम्म यसले दुई अर्ब ४९ करोड रुपैयाँ बढी खुद बिमा शुल्क आर्जन गरेको छ । यो गत वर्षको भन्दा ०.९८ प्रतिशतले थोरै हो । यता, खुद नाफा बढेपनि चुक्ता पुँजीमा उच्च वृद्धि हुँदा यसको प्रतिसेयर आम्दानी भने ५.८९ रुपैयाँले घटेर २०.५७ रुपैयाँमा आएको छ । प्रतिसेयर नेटवर्थ भने १९४.११ रुपैयाँ रहेको छ ।