राष्ट्रिय योजना आयोगको सदस्यमा अनिता ढुंगाना नियुक्त

काठमाडौं । राष्ट्रिय योजना आयोगको सदस्यमा अनिता ढुंगाना नियुक्त भएकी छन् । मन्त्रिपरिषदको आइतबार बसेको बैठकले आयोगको महिलातर्फ सदस्यमा लमजुङकी ढुंगानालाई नियुक्त गर्ने निर्णय गरेको हो ।

त्यस्तै बैठकले क्यानडामा भदौ ५ गते देखि ९ गतेसम्म आयोजना हुने विश्व वातवारण सुविधाको ७ औं सभा तथा सम्बन्धित बैठकहरुमा भाग लिन अर्थमन्त्री प्रकाशशरण महतको नेतृत्वमा प्रतिनिधिमण्डल पठाउने निर्णय गरेको छ ।

सिन्धुलीमाडी–भूमेस्थान–चकमके–उदयपुर कटारी सडक खण्डको स्तरोन्नतिका लागि राष्ट्रिय वन क्षेत्रको प्रयोग गर्न स्वीकृति दिने निर्णय बैठकले गरेको छ ।

मध्य तमोर जलविद्युत् आयोजनाको प्रसारण लाइनको निर्माणका लागि ताप्लेजुङ जिल्लाको राष्ट्रिय वन क्षेत्र प्रयोग गर्न र सो जग्गामा रहेका रुखहरु हटाउन स्वीकृति दिने तथा लंखुवाखोला साना जलविद्युत आयोजनाको भौतिक पूर्वाधारहरु निर्माण गर्न संखुवासभा जिल्लाको राष्ट्रिय वन क्षेत्र प्रयोग गर्न र सो वन क्षेत्रमा रहेका रुख हटाउने स्वीकृति दिने निर्णय मन्त्रिपरिषदले गरेको छ ।