७ महिनामा ५.० प्रतिशतले बढ्याे बैंक तथा वित्तीयको निक्षेप

काठमाडौं । चालु आर्थिक बर्षको ७ महिनामा बैंक तथा वित्तीय संस्थामा रहेको निक्षेप २५३ अर्ब ९७ करोडले बढेको छ । जुन अघिल्लो वर्षको सोही अवधिको तुलनामा ५.० प्रतिशतले बढी हो ।

राष्ट्र बैंकको तथ्याङ्क अनुसार अघिल्लो वर्षको सोही अवधिमा यस्तो निक्षेप १६७ अर्ब ३४ करोडले बढेको थियो । वार्षिक बिन्दुगत आधारमा भने गत माघ मसान्तमा बैंक तथा वित्तीय संस्थाहरूमा रहेको निक्षेप १०.५ प्रतिशतले बढेको छ । माघ मसान्तमा बैंक तथा वित्तीय संस्थाहरूको कुल निक्षेपमा चल्ती, बचत र मुद्दती निक्षेपको अंश क्रमशः ७.८ प्रतिशत, २५.८ प्रतिशत र ६०.१ प्रतिशत रहेको छ । अघिल्लो वर्ष यस्तो अंश क्रमशः ८.३ प्रतिशत, ३०.१ प्रतिशत र ५४.७ प्रतिशत रहेको थियो । गत माघ मसान्तमा बैंक तथा वित्तीय संस्थाहरुको कुल निक्षेपमा संस्थागत निक्षेपको अंश भने ३६.६ प्रतिशत रहेको छ । जुन अघिल्लो आर्थिक बर्षको माघ मसान्तमा यस्तो निक्षेपको अंश ३८.८ प्रतिशत रहेको थियो ।

समीक्षा अवधिमा बैंक तथा वित्तीय संस्थाहरुबाट निजी क्षेत्रमा प्रवाहित कर्जा १४८ अर्ब १२ करोडले बढेको छ । जुन अघिल्लो बर्षको तुलनमा १२.३ प्रतिशतले बढेको छ । अघिल्लो वर्षको सोही अवधिमा यस्तो कर्जा ५०३ अर्ब ९९ करोडले बढेको थियो । वार्षिक बिन्दुगत आधारमा गत माघ मसान्तमा बैंक तथा वित्तीय संस्थाहरुबाट निजी क्षेत्रतर्फ प्रवाहित कर्जा ३.९ प्रतिशतले बढेको छ । २०७९ माघ मसान्तमा बैंक तथा वित्तीय संस्थाहरुबाट निजी क्षेत्रमा प्रवाहित कर्जामध्ये गैर– वित्तीय संस्थागत क्षेत्रतर्फ प्रवाह भएको कर्जाको अंश ६४.५ प्रतिशत र व्यक्तिगत तथा घरपरिवार क्षेत्रतर्फ प्रवाह भएको कर्जाको अंश ३५.५ प्रतिशत रहेको छ । अघिल्लो वर्षको सोही अवधिमा यस्तो अंश क्रमशः ६३.९ प्रतिशत र ३६.१ प्रतिशत रहेको थियो ।

समीक्षा अवधिमा निजी क्षेत्रतर्फ प्रवाहित कर्जामध्ये वाणिज्य बैंकहरुको कर्जा प्रवाह ३.२ प्रतिशतले, विकास
बैंकहरुको ४.१ प्रतिशतले र वित्त कम्पनीहरुको०.८ प्रतिशतले बढेको छ । २०७९ माघ मसान्तमा बैंक तथा वित्तीय संस्थाहरुको लगानीमा रहिरहेको कर्जामध्ये ६७.३ प्रतिशत कर्जा घर जग्गाको धितोमा र १२.२ प्रतिशत कर्जा चालु सम्पत्ति (कृषि तथा गैर–कृषिजन्य वस्तु) को धितोमा प्रवाह भएको छ । २०७८ माघ मसान्तमा यस्तो धितोमा प्रवाहित कर्जाको अनुपात क्रमशः ६६.८ प्रतिशत र १२.७ प्रतिशत रहेको थियो ।

आर्थिक वर्ष २०७९/८० को सात महिनामा बैंक तथा वित्तीय संस्थाहरुको लगानीमा रहेको कर्जामध्ये कृषि क्षेत्रतर्फ प्रवाह भएको कर्जा ६.० प्रतिशतले, औद्योगिक उत्पादन क्षेत्रतर्फको कर्जा ८.६ प्रतिशतले, निर्माण क्षेत्रतर्फको कर्जा ४.२ प्रतिशतले, यातायात, संचार तथा सार्वजनिक सेवा क्षेत्रतर्फको कर्जा ९.६ प्रतिशतले, थोक तथा खुद्रा व्यापार क्षेत्रतर्फको कर्जा ३.४ प्रतिशतले, सेवा उद्योग क्षेत्रतर्फको कर्जा ६.१ प्रतिशतले र उपभोग्य क्षेत्रतर्फको कर्जा १.५ प्रतिशतले बढेको छ ।

समीक्षा अवधिमा बैंक तथा वित्तीय संस्थाहरुबाट प्रवाहित कर्जामध्ये आवधिक कर्जा १३.९ प्रतिशतले, डिमान्ड तथा चालु पुँजी कर्जा २.५ प्रतिशतले र रियल स्टेट कर्जा (व्यक्तिगत आवासीय घर कर्जा समेत) २.४ प्रतिशतले बढेको छ भने अधिविकर्ष कर्जा ५६.२ प्रतिशतले, ट्रष्ट रिसिट (आयात) कर्जा ०.७ प्रतिशतले, मार्जिन प्रकृतिको कर्जा ७.१ प्रतिशतले र हायर पर्चेज कर्जा ९.९ प्रतिशतले घटेको छ ।