कानुन नभएको भन्दै दोहोरो सुविधा नपाएकाहरूले पाउनुपर्ने भन्दै सर्वोच्चमा रिट

काठमाडौं  । मन्त्रिपरिषद बैठकले दोहोरो सुविधा लिन नपाउने निर्णय गरे पनि सरकारका उच्च अधिकारीहरू कानुन नभएको बहानामा दोहोरो सुविधा लिइरहेका छन्। सरकारी सेवाबाट अवकाशपछि फेरि सार्वजनिक सेवामै रहेका अनुमानित ५ हजार बढी कर्मचारीले दोहोरो सुविधा लिइरहेको बताइन्छ।

ताना गौतम, विमलप्रसाद वाग्ले, बिन्द्रा हाडा भट्टराई, अर्जुनबहादुर थापा, श्रीपुरुष ढकाल, अशोककुमार झा, सावित्री थापा गुरुङ, कृष्णचन्द्र झा, धुव्रप्रसाद शर्मा, केशवप्रसाद भट्टराई, केशव बराल, किशोर थापालगायतले कानुन नभएको भन्दै दोहोरो सुविधा फिर्ता गर्न आनाकानी गरिरहेका छन्। कयोदेवी यमीले २५ वर्ष नेपाल विज्ञान तथा प्रविधि प्रतिष्ठान (नास्ट) मा काम गरिन्।

त्यहाँबाट अवकाश लिएपछि लोकसेवा आयोगमा ६ वर्ष काम गरिन्। तर, उनले एक वर्षदेखि पेन्सन रोकिएको बताएकी छन्। कुनै कानुनमा उल्लेख नगरी आफूले २५/२६ वर्ष काम गरेबापत पाउने पेन्सनसमेत रोकिएपछि अदालत पुग्न बाध्य भएको उनले बताइन्। उनीसँगै टिकादत्त निरौला र राजेन्द्र शाहले पनि सुविधा पाउनुपर्ने दाबीसहित सर्वोच्चमा रिट दायर गरिसकेका छन्। आजको नागरिक दैनिकमा खबर छ ।