प्रधानमन्त्रीस्तरमा नै समाधान खोजिने तीनदलको निर्णय

काठमाडौं। प्रमुख तीन दलले भारतले अघोषित नाकाबन्दी हटाएको भनेर झुक्याएको भन्दै गम्भीर आपत्ति जनाएका छन् । प्रमुख तीन दलको सोमबार बालुवाटारमा बसेकोे बैठकमा नाकाबन्दीबारे गम्भीर छलफल भएको नेताहरुले बताएका छन् । अब यो विषयमा दुई देशका प्रधानमन्त्रीस्तरमै छलफल गर्ने बैठकको निर्णय छ । कांग्रेस, एमाले र एमाओवादीको बैठकले तत्काल समस्या समाधानका लागि उच्चस्तरमा कुरा गर्ने निर्णय गरेको छ । यो भनेको दुई देशका प्रधानमन्त्री स्तरमै वार्ता गर्ने भएको नेताहरुले बताएका छन् । नेपालको आन्तरिक मामिलालाई लिएर नाकाबन्दी गर्नु र पछि हटाएको भनी झक्याउनु पनि गम्भीर रहेको तीनदलको बुझाई छ ।

नयाँ संविधानमा मधेसका केही मुद्दा सम्बोधन नभएको भन्दै एकातीर तराई क्षेत्र महिनौ देखि बन्द रहेकोमा भारतले पनि त्यसकै समर्थनमा दुईसातादेखि अघोषित नाकाबन्दी लगाउँदै आएको छ । शनिबार सीमा नाकाहरुमा आवागमन सहज बनाउन निर्देशन  भनिएपनि त्यसो हुन सकेको छैन् । अहिले पनि सीमामा अवरोध जारी छ भने आइओसीले अहिले पनि नेपाललाई पेट्रोलियम पदार्थ दिएको छैन ।