निर्जीवन बीमामा सबैभन्दा बढी कर तिर्ने कम्पनी बन्यो सिद्धार्थ प्रिमियर « Devoted for Economic Devlopment, आर्थिक विकासको लागि समर्पित

अर्थबजार स्टोरी

निर्जीवन बीमामा सबैभन्दा बढी कर तिर्ने कम्पनी बन्यो सिद्धार्थ प्रिमियर



काठमाडौं । निर्जीवन बीमा कम्पनीहरूमध्ये सबैभन्दा बढी कर तिर्ने कम्पनीका रूपमा सिद्धार्थ प्रिमियर इन्स्योरेन्स सम्मानित भएको छ। राष्ट्रिय कर दिवसका अवसरमा मंगलबार मंसिर १ गते आयोजित कार्यक्रममा कम्पनीलाई सम्मान गरिएको हो।

गत आर्थिक वर्ष २०८२/८३ मा निर्जीवन बीमा क्षेत्रबाट सबैभन्दा बढी कर दाखिला गरेको भन्दै सरकारले कम्पनीलाई सम्मान गरेको हो। आन्तरिक राजस्व विभागले आयोजना गरेको कार्यक्रममा अर्थमन्त्री डा. स्वर्णिम वाग्लेले सिद्धार्थ प्रिमियर इन्स्योरेन्सका प्रमुख कार्यकारी अधिकृत वीरेन्द्रबहादुर वैदवारलाई सम्मानपत्र प्रदान गरे।

साविक सिद्धार्थ इन्स्योरेन्स र प्रिमियर इन्स्योरेन्स एकआपसमा गाभिएर बनेको सिद्धार्थ प्रिमियरले मर्जरपछिको व्यावसायिक समन्वयबाट लाभ लिन थालेको छ। कम्पनीले इक्रा नेपालबाट ‘A’ रेटिङ पुनः प्राप्त गरेको छ।

यद्यपि, कम्पनीको दाबी अनुपात भने बढेर करिब ९८ प्रतिशत पुगेको छ। समग्र बीमा क्षेत्रको औसत दाबी अनुपात करिब ८५ प्रतिशत रहेको अवस्थामा कम्पनीको दाबी अनुपात तुलनात्मक रूपमा उच्च देखिएको छ।

दाबी अनुपात बढेसँगै कम्पनीको कम्बाइन्ड रेसियो पनि १२३ प्रतिशत पुगेको छ। सामान्यतया कम्बाइन्ड रेसियो १०० प्रतिशतभन्दा माथि हुनु कम्पनीको बीमा व्यवसाय अन्डरराइटिङतर्फ घाटामा रहेको संकेत हो।

तर, अघिल्ला वर्षहरूमा अन्तिम त्रैमासमा देखिएको सुधारलाई आधार मान्दै सन् २०२६ को पूर्ण अवधिमा यस्तो घाटा कम हुने अपेक्षा गरिएको छ।

कम्पनीको अध्यक्षमा सुरेशलाल श्रेष्ठ र प्रमुख कार्यकारी अधिकृतमा वीरेन्द्रबहादुर वैदवार रहेका छन्।

प्रकाशित : 17 November, 2026 2:23 pm