सेञ्चुरीले सेती फाइनान्स गाभ्दै

काठमाडौं, २१ असार ।सेञ्चुरी कमर्सियल बैंकले सेती फाइनान्स प्राप्तिको लागि नेपाल राष्ट्र बैंकबाट सैद्धान्तिक सहमति प्राप्त गरेको छ । यसअघि बैंकले इन्नोभेटिभ डेभलपमेन्ट बैंक तथा अरनिको डेभलपमेन्ट बैंकलाई प्राप्ति गरी एकीकृत कारोबारसमेत गरिसकेको छ ।

बैंकको असार १८ गते बसेको विषेश साधारणसभाले सगरमाथा फाइनान्सलाई पनि प्राप्ति गर्ने प्रस्तावलाई अनुमोदन गरिसकेको छ । यसअघि अल्पाइन डेभलपमेन्ट बैंकलाई प्राप्ति गर्न एलओआई प्राप्त गरी बैंकले प्रक्रिया अगाडि बढाएको छ । सबै संस्थालाई गाभेर पनि नेपाल राष्ट्र बैंकले तोकेको ८ अर्ब रुपैयाँ चुक्ता पुँजी नपुग रकम चालू आर्थिक वर्षको नाफाबाट जुटाउने सेञ्चुरी बैंकले जनाएको छ ।

सबै संस्था गाभिएपश्चात् बैंकको कुल शाखा संख्या ९० वटा हुनेछ । बैंकले हालसम्म ५३ वटा शाखा, ३३ वटा एटीएम, १५ वटा शाखारहित बैंकिङ काउन्टर र ५ वटा एक्सटेन्सन काउन्टरबाट सेवा प्रदान गर्दै आएको छ ।