‘शान्तिबिना स्थायित्व र स्थायित्वबिना समृद्धिको परिकल्पना गर्न सकिन्न’

काठमाडौं । राष्ट्रिय स्वतन्त्र पार्टी (रास्वपा)का उपसभापति डिपी अर्यालले मुलुकमा शान्ति, स्थायित्व र समृद्धिबारे फेरि बहस गर्नुपर्ने अवस्था आउनु चिन्ताजनक भएको बताएका छन् ।

नेपाल उद्योग वाणिज्य महासंघले बुधबार आयोजना गरेको ‘शान्ति, स्थायित्व र समृद्धिका लागि सहकार्य’ विषयक संवाद कार्यक्रममा बोल्दै उपसभापति अर्यालले २१ औं शताब्दीमा विश्व प्रविधि र विकासमा निकै अगाडि बढिसक्दा नेपालमा अझै शान्ति, स्थायित्व र समृद्धिको विषयमा बहस गर्नुपरेको अवस्थाप्रति प्रश्न उठाए । उनले यस्तो अवस्था किन र कसरी आयो भन्ने विषयमा गम्भीर बहस आवश्यक भइसकेको बताए ।

उनले भने, ‘२१ औं शताब्दिको विश्व बजार कहाँ पुगिसक्यो प्रविधिमा, विकासमा, आज हामी आएर शान्तिको लागि,समृद्धिको लागि, स्थायित्वको लागि बहस गर्नुपर्ने अवस्थामा छौं । यो अवस्था कसले ल्यायो? किन आयो? यसको उत्तर कसले दिने हो यसमा पनि बहस आवश्यक परिसकेको देखिन्छ ।’