प्रभू बैंकको नाफामा उल्लेख्य सुधार

काठमाडौं । प्रभू बैंकको नाफामा उल्लेख्य सुधार देखिएको छ । एकै वर्ष साढे १० गुणा बढाएको छ । बैंकले बुधवार प्रकाशन गरेको गत आर्थिक वर्ष २०८१–८२ को चौंथो त्रैमासिक वित्तीय विवरणले यस्तो देखाएको हो ।

गत आवमा बैंकले ५ अर्ब ४४ करोड २६ लाख ९३ हजार रुपैयाँ खुद नाफा कमाएको छ । यो नाफा अघिल्लो आवको तुलनामा ९६५.४१ प्रतिशत अर्थात् १०.६५ गुणा बढी हो ।

गत आवमा बैंकले ७ अर्ब १९ करोड ७८ लाख ६४ हजार रुपैयाँ खुद ब्याज आर्जन गरेको छ । तर, यो अघिल्लो आवको तुलनामा ३९.४७ प्रतिशत कमी हो ।

कम्पनीको संचालन नाफा पनि ९९.४५ प्रतिशत बढेर ६ अर्ब २८ करोड २७ लाख रुपैयाँ कायम भएको छ । जबकि, अघिल्ला आवमा बैंकको यस्तो नाफा ३ अर्ब १५ करोड रुपैयाँ रहेको थियो ।

बैंकको वितरणयोग्य नाफा १ अर्ब ४ करोड ५१ लाख रुपैयाँ कायम भएको छ । यसका आधारमा गत आवको मुनाफाबाट यो वर्ष बैंकले आफ्ना सेयरधनीलाई ४.४४ प्रतिशत लाभांश दिन सक्नेछ । यस्तो नाफा अघिल्लो वर्ष ऋणात्मक थियो ।

हाल बैंकको प्रतिसेयर आम्दानी (इपिएस) २३.१२ रुपैयाँ छ, जबकि अघिल्लो आवमा २.१७ रुपैयाँ मात्र थियो । यता, प्रतिसेयर नेटवर्थ १६२ रुपैयाँ छ ।

हाल बैंकको खराब कर्जा ४.९६ प्रतिशत छ । बैंकको निक्षेप संकलन पनि १२.१९ प्रतिशत बढेर ३ खर्ब ४२ अर्ब १८ करोड ८५ लाख रुपैयाँ कायम भएको छ । यता, कर्जा प्रवाह पनि ४.२२ प्रतिशत बढेर २ खर्ब ३० अर्ब ३७ करोड २ लाख रुपैयाँ पुगेको छ ।

हाल बैंकको चुक्ता पुँजी २३ अर्ब ५४ करोड २४ लाख रुपैयाँ छ । बैंकले जगेडा कोषमा १४ अर्ब ५९ करोड ६३ लाख रुपैयाँ राखेको छ ।