पोखरा रोयलद्वारा संरक्षित पूँजी फिर्ता कोषको रकम बाँडफाँट

काठमाडौ ।पोखरा रोयल बचत तथा ऋण सहकारी संस्थाले संरक्षित पूँजी फिर्ता कोषबाट सदस्यहरुले पाउने रकम बाँडफाँट गरेको छ । संस्थाले २३औं वार्षिक साधारण सभा सम्पन्न गरेकै दिन (७ गते सोमबार) कोषको रकम बाँडफाँट कार्य सम्पन्न गरेको हो ।

सहकारी ऐन २०७४ तथा नियमावली २०७५ मा सदस्यले संस्थामा जम्मा गरेको बचत रकमको लागि ४० प्रतिशत र कर्जामा तिरेको ब्याज रकमको लागि ६० प्रतिशत भारको आधारमा संरक्षित पूँजी फिर्ता कोषको रकम बाँडफाँड गर्नुपर्ने व्यवस्था छ ।

आर्थिक वर्ष २०८०/८१ मा पोखरा रोयलको संरक्षित पूँजी फिर्ता कोषमा ९२ लाख १५ हजार ७ सय ८० रुपैयाँ ३५ पैसा जम्मा भएको थियो । यस वर्ष संस्थाले बचततर्फको कारोबारमा २.१३ प्रतिशत र ऋण तर्फको कारोबारमा २.२३ प्रतिशत वितरण गरेको हो ।

उक्त रकम सदस्यको बचत खातामा जम्मा गरिएको संस्थाका मुख्य प्रबन्धक तथा सूचना अधिकारी मीलन ढकालले जानकारी दिए । साथै साधारण सभाबाट पारित भएको ९.४८ प्रतिशत शेयर लाभांश पनि सदस्यलाई वितरण गरिसकेको ढकालले जानकारी दिए ।

सहकारी नियमावली २०७५ मा ऋणको भाखा नघाएको सदस्यलाई त्यस्तो ऋणमा तिरेको ब्याजको आधारमा संरक्षित पूँजी फिर्ता नदिइने उल्लेख छ ।

पोखरा रोयलले यस वर्ष ४ करोड ९१ लाख ५० हजार ८ सय २८ रुपैयाँ मुनाफा आर्जन गरेको थियो ।