अधिक तरलता व्यवस्थापन गर्न दिनदिनै पैसा तान्दै राष्ट्र बैंक, फेरि २५ अर्ब रुपैयाँ तान्दै

काठमाडौं। नेपाल राष्ट्र बैंकले फेरी २५ अर्ब रुपैयाँ तान्ने भएको छ । बजारमा रहेको अधिक तरलतालाई व्यवस्थित गर्न राष्ट्र बैंकले २५ अर्ब रुपैयाँको निक्षेप संकलन गर्न लागेको हो। बैंकले अघिल्लो दिन पुस १७ गते पनि ७ दिने अवधिको १० अर्ब निक्षेप संकलनका लागि बोलकबोल आह्वान गरेको थियो ।

बैंकले निक्षेप सङ्कलन उपकरणको माध्यमबाट १४ दिने निक्षेप सङ्कलन गर्न लागेको हो । अनलाइन बिडिङ सिस्टममार्फत आज दिउँसो २ बजेबाट बोलकबोल हुने बैंकले जनाएको छ ।

इच्छुक आवेदकले घटीमा १० करोड रुपैयाँ र बढीमा ५ करोड रुपैयाँले भाग गर्दा निःशेष भाग जाने गरी कुल आह्वान रकमसम्मका लागि आवेदन दिन सक्नेछन् । निक्षेप सङ्कलनको परिपक्वता वा सावाँ ब्याज भुक्तानी आगामी माघ ३ गते हुनेछ ।

निक्षेप संकलनमा नेपाल राष्ट्र बैंकबाट इजाजत प्राप्त क,ख र ग वर्गका बैंक तथा वित्तीय संस्थाले सहभागिता जनाउन सक्ने बैंकले जनाएको छ ।