वित्तीय साक्षरता सम्बन्धी अन्तरक्रिया

विराटनगर । उद्योग संगठन मोरङ महिला उद्यम समिति र अमेरिकन कर्नर विराटनगरले महिला उद्यमी र व्यवसायीहरुका लागि वित्तीय साक्ष्ँरता सम्वन्धी अन्तरक्रिया कार्यक्रम आयोजना गरेको छ । कार्यक्रममा संगठनका अध्यक्ष सुयश प्याकुरेलले वित्तीय साक्षरताले आर्थिक लक्ष्य निर्धारण, पूँजीको व्यवस्थापन, आफनो सम्पत्तीको संरक्षण गर्नका साथै भविष्यमा आईपर्ने जोखिम बारेमा जानकारी प्राप्त गर्न मद्त पुर्याउने बताउदै महिलाहरुलाई वित्तीय क्षेत्रबाट प्रवाह हुने सेवाबाट लाभान्वित हुन अनुरोध गरे ।

ग्राहकहरुलाई आफुले प्रदान गर्दै आएको सेवा र सुविधा प्रति आकर्षित गर्न वित्तीय साक्षरता अभियानलाई प्राथमिकता दिन वित्तीय संस्थाहरु समक्ष अनुरोध गर्दै उनले यस प्रकारको कार्यक्रमले वित्तीय साक्षरता विभिन्न आयामलाई बुझन सहयोग पुर्याई वित्तीय प्रणालीमा विश्वास अभिवृद्धि गर्ने बताए ।

महिला उद्यम समितिको संयोजक प्रतिभा रिजालले वित्तीय साक्ष्ँरताले महिला उद्यमी व्यवसायीहरुलाई उपयुक्त निर्णय लिन सक्षम बनाउने कुरालाई मध्यनजर गरी अन्तरक्रिया कार्यक्रम आयोजना गरिएको बताईन । उनले महिला उद्यमी व्यवसायीहरुको वित्तीय क्षेत्रमा पहुच बढाउन साक्षरता अभियानले उत्प्रेरकको भूमिका निर्वाह गर्ने विश्वास व्यक्त गरिन ।

वैकर्स शर्मिला होमागाईले वित्तीय लक्ष्य निर्धारण, ऋणको सदुपयोग, खर्च गर्दा अपनाउनु पर्ने सतर्कता, जोखिम वहन क्षमता लगायतका विषयमा प्रकाश पार्दै वित्तीय संस्थाले महिला उद्यमी व्यवसायीहरुको सुविधाका लागि गरेको व्यवस्थाका वारेमा वताईन । उनले कुनैपनि क्षेत्रमा लगानी गर्नुअघि महिला उद्यमी व्यवसायीलाई वित्तीय लक्ष्य निर्धारण अनुरोध गर्दै त्यसबाट आईपर्ने सहजता र चूनौतिलाई पूर्वानुमान गर्न आग्रह गरिन ।

वैकर्स समिर श्रेष्ठले प्रविधिका कारण डिजीटल बै‌किङमा सर्वसाधारणको आकर्षण वढदो क्रममा रहेकाले मानिसहरुलाई सेवा उपभोग गर्न वैकसम्म धाउनुपर्ने बाध्यतामा कमी आएको बताए । उनले महिला उद्यमी व्यवसायीहरुलाई डिजीटल वैंकिङ प्रणाली प्रति अभ्यस्त हुन अनुरोध गर्दै वित्तीय संस्थाले डिजीटल बै‌किङका माध्यमबाट उपलब्ध गराउदै आएका सेवाहरुका विषयमा जानकारी दिए ।

नेपाल उद्योग वाणिज्य महासंघ कोशी प्रदेशकी निवर्तमान अध्यक्ष सरु केसीले महिला उद्यमी व्यवसायीलाई बढावा दिदा राज्य प्रणाली प्रति सकारात्मक सन्देश गई आर्थिक विकासमा सहयोगी सिद्ध हुने बताउदै महिलाहरुलाई आफुमा निहित सिपलाई उद्यमशिलता विकासमा रुपान्तरण गर्न आग्रह गरिन ।

कार्यक्रममा उद्योग संगठन मोरङ महिला उद्यम समितिका सदस्यहरु, महिला उद्यमीहरु व्यवसायीहरुको सहभागिता रहेको थियो ।