सुनको मूल्यमा नयाँ कीर्तिमान,यस्तो छ कारण

सुनको भाउ मंगलबार तोलामा २ सय रुपैयाँ बढेको छ । सुनको भाउ मंगलबारका लागि तोलाको ६८ हजार रुपैयाँ तोकिएको नेपाल सुनचाँदी ब्यवसायी महासंघले जनाएको छ । यो भाउ अहिलेसम्मकै धेरै हो ।

सुन सोमबार एकैदिन तोलामा १५ सय रुपैयाँ बढेर तोलाको ६७ हजार ८ सय रुपैयाँ पुगेको थियो । गएको आइतबारदेखि नै उकालो लागेको सुनको भाउले मंगलबार पनि नयाँ कीर्तिमान बनाएको हो । शुक्रबार तोलाको ६५ हजार ८ सय रुपैयाँ कायम भएको सुनको भाउ त्यसयता बढ्दै नयाँ किर्तिमान बनाइरहेको छ ।

अमेरिका र चीनबिच व्यापारिक तनाव बढ्नुका साथै जम्मू कश्मिर विवादका कारण अन्तर्राष्ट्रिय बजारमा सुन महंगो भएको महासंघले जनाएको छ । यसकै असरले नेपालमा पनि सुनको भाउ अकासिएको हो ।

चाँदीको भाउ भने मंगलबार घटबढ भएको छैन । चाँदी मंगलबार पनि तोलाको ७ सय ९५ रुपैयाँमा कारोबार भैहरेको छ ।

यस्तो छ कारण

खासमा सुनको मूल्य किन यसरी बढिरहेको छ त ? यो सबै अमेरिकाको फेडरल रिजर्भ बैंकले ब्याजदर घटाएका कारण भएको हो । फेडरल रिजर्भ बैंक अमेरिकाको केन्द्रीय बैंक हो । नेपाल सुनचाँदी व्यवसायी संघका अनुसार बैंकलेले ०.२५ प्रतिशतले ब्याजदर घटाएको छ, त्यसले गर्दा लगानीकर्ता सुनमा आकर्षित भएका हुन् ।

विश्वभरि मानिसहरुले सुन तथा अमेरिकी डरललाई सम्पत्ती मान्ने हुनाले आफ्नो सम्पत्ती सुन वा डलरमा संचय गर्न खोज्छन् भन्ने मान्यता छ । त्यसैले सुन र अमेरिकी डलरको बिचमा विपरित सम्बन्ध कायम हुने गरेको छ । डलरको संचय बढाउन खोज्दा माग बढ्छ र डलरको मूल्य बढ्छ, यसले गर्दा मानिसहरु सुनको माग घटाउँछन् । माग घटेपछि स्वभावैले मूल्य पनि झर्छ । यसको ठिक विपरित, मानिसहरुले सुनको माग बढाएमा मूल्य बढ्छ र डलरको माग घटेकैले मूल्य पनि घट्छ ।

अहिले फेडरल रिजर्भ बैंकको ब्याजदरले गर्दा मानिसहरु डलरको माग कम गरे र सुनको माग बढाएकोले सुनको मूल्य बढेको नेपाली सुन व्यवसायीहरुको छाता संगठनले जानकारी दिएको छ। पछिल्लो समय बढ्दो अमेरिका चीनको व्यपार युद्धको असर पनि सुनको मूल्यमा देखिएको संघले जनाएको छ । गत हप्ता अमेरिकी राष्ट्रपति डोनाल्ड ट्रम्पले ३ सय विलियन डलरका चिनियाँ सामानको आयातमा १० प्रतिशत अतिरिक्त भन्सार दर बढाएका थिए । व्यापार युद्धका कारण पनि लगानीकर्ता डलर बेचेर सुनको संचय गर्न आकर्षित भए । यसले सुनको माग बढ्यो र सुनको मूल्य पनि बढ्यो ।