६ म्युचुअल फण्डले गैरकानूनी रुपमा मुद्धतीमा पैसा राखेको पुष्टि

काठमाण्डौ । तोकिएको सीमा भन्दा बढी बैंक निक्षेपमा पैसा जम्मा गरी दोश्रो बजार चौपट बनाएको आरोप खेपिरहेका म्युचुअल फण्डहरुका व्यवस्थापकहरुसँग धितोपत्र बोर्डले स्पष्टीकरण सोधेको छ ।

म्युचुअल फण्डहरुले कानूनी व्यवस्थाको धज्जी उडाउँदै मुद्धती निक्षेपमा पैसा राख्दा दोश्रो बजार नराम्ररी प्रभावित भइसकेको छ । बजारको निरन्तरको गिरावट पछाडि केही म्युचुअल फण्डको फट्याईँ मुख्य कारक देखिएपछि बोर्ड एक्सनमा गएको स्रोतको भनाई छ ।

यी योजनाहरुले बोर्डमा पेश गरेको मासिक खूद सम्पत्ति सम्बन्धी विवरण अनुसार उक्त योजनाको रकम लगानी गर्दा बैंक निक्षेपमा तोकिएको सीमाभन्दा बढी हुने गरी लगानी गरेको पाइएको समेत बताइएको छ ।

‘यो बिषयमा बोर्डले स्थलगत निरीक्षण गर्दा समेत म्युचुअल फण्डहरुले गैरकानूनी ढंगले लगानी गरेका पाइएकोले यस कार्यबाट सामूहिक लगानी कोष नियमावली २०६७ को नियम ३६ को (१) को खण्ड ङ को व्यवस्थाको पालना नगरेको नदेखिएको हुँदा उक्त योजना व्यवस्थापकहरुलाई कारबाही  किन नगर्ने भनी १५ दिनको म्याद दिई स्पष्टीकरण माग गरिएको छ ।’-बोर्डको विज्ञप्तिमा भनिएको छ ।