आजदेखि अनलाइन प्रणाली

काठमाण्डौ । नेपाल स्टक एक्सचेञ्जले पूर्ण स्वचालित अनलाइन सेयर कारोबार प्रणालीको पूर्ण परीक्षण आजदेखि सुरु गरेको छ । यसका लागि आफ्ना ब्रोकरमा गएर लगानीकर्ताले यूजर नेम र पासवर्ड लिनुपर्नेछ ।

नेपाल स्टक एक्सचेञ्जका निराजन फूयाँलका अनुसार आफ्ना ब्रोकरकोमा गएर यूजर नेम तथा पासवर्ड लिएपछि लगानीकर्ताले अनलाइन प्रणालीमा प्रवेशको अवसर पाउनेछन् । पूर्ण परीक्षणकालको सुरुवात भएकोले उनीहरुले आफ्ना ब्रोकरहरुलाई अनलाइन खरीद वा बिक्रीको अर्डर भने दिनसक्ने छैनन् ।

उनका अनुसार अर्डर दिने बाहेकका सबै काम अनलाइनमै हुन्छ । युजर एसेप्टेन्स टेष्ट(युएटी)नभई अनलाइन प्रणाली भ्यालिड हुन्न । यूएटीका लागि २ वटा कम्पनी छनौट भइसकेका छन् ।

यसको अर्थ आजदेखि लगानीकर्ताले अनलाइन अर्डर दिन पाउँदैनन्, तर अर्डर दिइसकेपछि कसरी अगाडि बढ्छ, के के काम हुन्छ भन्ने कुरा चाहि हेर्न पाउँछन् । यसरी हेर्दा आजदेखि सुरु पूर्ण परीक्षणसँगै अनलाइन प्रणालीमा प्रवेश गरेर लगानीकर्ताले पनि कारोबार गर्न सिक्नेछन्, हात बसाउने छन् ।

यूएटी अवधिभरि लगानीकर्ताका लागि पुरानो सिस्टम समेत समानान्तर ढंगले लगिनेछ । जानकारहरुका अनुसार यसलाई अझ राम्रोसँग भन्दा आजदेखि लगानीकर्ताले अहिलेकै तरिकाले अर्डर दिन्छन्, त्यो अर्डर कसरी म्याच भयो, त्यसपछि कस्तो रिपोर्ट आयो भन्ने कुरा लगानीकर्ताले आफ्नो टर्मिनलमा हेर्ने सुविधा पाउँछन् ।

पूर्व निर्धारित समयतालिका अनुसार प्रणाली निर्माता कम्पनी वाइको प्रालिले आवश्यक सबै मोड्यूलहरु एकीकृत रुपमा तयार पारी नेप्सेलाई दिएपछि आजदेखि पूर्ण परीक्षण संभव भएको हो ।

अनलाइन प्रणालीको परीक्षणअघि नेप्सेले कारोबारमा सम्बद्ध पक्षहरु धितोपत्र दलाल, सिडिएससी, क्लियरिङ बैंक र लगानीकर्तासँग समेत औपचारिक तथा अनौपचारिक छलफल गरिसकेको छ ।