काठमाडौं । घरभित्रको वातावरणलाई शुद्ध राख्न विभिन्न किसिमका बिरुवाहरू राख्ने गरिन्छ । यस्ता बिरुवाले हावामा भएको विकार हटाउने मात्रै नभइ कोठाको आकर्षण पनि बढाउँछन् । त्यस्तै एउटा लोकप्रिय बिरुवा हो – ‘एरिका पाम’ ।
कम हेरचाह भए पुग्ने र कोठाको वातावरणमा ताजगी ल्याउने यो बिरुवालाई सुत्ने कोठामा राख्दा हुने फाइदाबारे चर्चा गरौं:
१. हावालाई स्वच्छ राख्नेः
एरिका पामले हावामा भएका विषाक्त पदार्थहरूलाई फिल्टर गरेर सफा बनाउँछ । एरिका पाममा प्राकृतिक रूपमा कार्बनडाइअक्साइडलाई अक्सिजनमा परिवर्तन गर्ने क्षमता हुन्छ । NASA को एक अध्ययनले एरिका पामलाई हावाबाट विषाक्त पदार्थहरू फिल्टर गर्ने एक उत्कृष्ट बिरुवाको रूपमा प्रमाणित गरेको छ । यसले हावामा पाइने विषाक्त रसायनहरू निर्माण सामग्री, पेन्ट, र फर्निचरबाट उत्पन्न हुने एक विषालु ग्यास फर्माल्डिहाइड (Formaldehyde), औद्योगिक रसायनहरू र गाडीको धुवाँबाट उत्पन्न हुने बेंजिन (Benzene), दाउरा, ग्यास, वा धूम्रपानबाट उत्पन्न हुने कार्बन मोनोअक्साइड जस्ता रसायनहरूको मात्रा कम गर्न महत्वपूर्ण भूमिका खेल्छ ।
२. नमी उत्सर्जन गरी हावा सन्तुलन गर्नेः
एरिका पामले प्राकृतिक रूपमा हावामा पानीका थोपा छोड्छ । जसले कोठामा नमी थपेर हावालाई सन्तुलनमा राख्छ । यसले गर्दा छाला सुक्खा हुने समस्या कम हुन्छ र स्वास्थ्यमाथि सकारात्मक असर पार्छ । साथै छालाको सुक्खापन र श्वासप्रश्वासमा हुने समस्याहरू कम गर्न मद्दत गर्छ ।
३. प्राकृतिक एयर प्युरिफायरः
NASA ले एरिका पामलाई एक प्रभावकारी एयर प्युरिफायर(Air purifier)को रूपमा प्रमाणित गरेको छ । यसले हावाबाट फर्मल्डिहाइड, बेंजिन, र कार्बन मोनोअक्साइड जस्ता विषाक्त पदार्थहरू हटाउँछ, जसले सुत्ने कोठाको वातावरणलाई शुद्ध र स्वास्थ्यवर्द्धक बनाउँछ ।
४. तनाव र चिन्ता कम गर्नेः
तनाव, चिन्ता, र थकान कम गर्न हाम्रो वरपरको वातावरणले ठूलो भूमिका खेल्छ । हरियाली वातावरणले मानिसको मनोविज्ञानमा सकारात्मक प्रभाव पार्छ । साथै एरिका पामले हावाको गुणस्तर सुधार्ने, अक्सिजनको मात्रा बढाउने, र वातावरणलाई शान्त बनाउने हुँदा शरीरलाई स्फूर्त राख्न मद्दत पुग्छ ।
५. समृद्धि तथा धन लाभको योग मिल्नेः
फेंगशुई अनुसार, एरिका पामलाई भाग्यशाली बिरुवा मानिन्छ । यसले घरमा धन, शान्ति, र समृद्धि ल्याउँछ, साथै नकारात्मक ऊर्जा हटाएर सकारात्मक ऊर्जा आकर्षित गर्छ । फेंगशुईमा हरियालीले वातावरणमा समृद्धि, शान्ति, र स्थायित्व ल्याउने विश्वास छ ।
Comment