माण्डु हाईड्रोपावरकाे खुद नाफा १२.३१ प्रतिशतले बढ्याे

काठमाडौं। माण्डु हाईड्रोपावर लिमिटेडले चालु आवको तेस्रो त्रैमाससम्ममा २२ करोड १५ लाख रुपैयाँ खुद नाफा आर्जन गरेको छ । यो नाफा गत आवको सोहि अवधिको तुलनामा १२.३१ प्रतिशतले धेरै हो । अघिल्लो आवको तेस्रो त्रैमाससम्म कम्पनीले १९ करोड ७२ लाख रुपैयाँ खुद नाफा आर्जन गरेको थियो ।

समीक्षा अवधिसम्म कम्पनीले विद्युत बिक्रीमार्फत ५८ करोड २० लाख रुपैयाँ खुद आम्दानी गरेको छ । यो रकम गत आवको तुलनामा २.८३ प्रतिशतले कम हो । यस्तै कम्पनीको वित्त खर्च १७ करोड १३ लाख र सामाजिक उत्तर दायित्वअन्तर्गत २२ लाख ३८ हजार रुपैयाँ खर्च गरेको छ । एक अर्ब ३६ करोड रुपैयाँ चुक्तापूँजी भएको कम्पनीले सेयर प्रिमियम शिर्षकमा १७ करोड पाँच लाख रुपैयाँ छुट्टाएको छ ।

कम्पनीले कर्मचारीको तलब तथा सेवा सुविधाका लागि दुई करोड २६ लाख, सञ्चालन तथा मर्मतका लागि चार करोड ९८ लाख र कम्पनीको प्रशासनिक सञ्चालनका लागि ५३ लाख ९४ हजार रुपैयाँ खर्च गरेको छ ।

कम्पनीको रिटेन्ड अर्निङ ३६.९६ प्रतिशतले बढेर ४२ करोड २९ लाख रुपैयाँ पुगेको छ । कम्पनीको कुल चालु सम्पत्ति १६ करोड ३३ लाख रुपैयाँ र कुल चालु दायित्व नौं करोड ७४ लाख रुपैयाँ रहेको छ ।

समीक्षा अवधिसम्म कम्पनीको प्रतिसेयर आम्दानी(ईपीएस)२१.६६ रुपैयाँ,प्रतिसेयर नेटवर्थ १४३.५३ रुपैयाँ कायम भएको छ ।