बजेटको उपहार सर्वसाधारणलाई महङ्गी ,पेट्रोल–डिजेलको मूल्य बढ्यो

चालू आर्थिक वर्षको लागि १० खर्ब ४८ अर्ब ९२ करोड १३ लाख रूपैयाँको बजेट विनियोजन गर्दै सरकारले कर्मचारीको विद्यामान तलवमा २५ प्रतिशतले हुन आउने गरी तलबमा बृद्धि गरेको छ । अब एउटा अधिकृत तहमा व्यक्तिले ३०, ५०० रूपैयाँ पाउने भएका छन् । सरकारले सांसद् विकास कोषमा अघिल्लो सरकारले सांसदहरू उच्च दबाबको भरमा परी १५ लाख बनाएकोमा यो सरकारले ५० लाख पुर्‍याएको छ । यसले सांसद्हरूको सीधा अधिनमा जिल्ला विकास समिति मार्फत् खर्च गर्न पाउने सो रकममा बृद्धि गर्दा रकम सदुपयोग भन्दा पनि दुरूपयोग हुने सम्भावना बढी रहेको विज्ञहरूले दाबी गरेका छन् । त्यस्तै, निर्वाचन क्षेत्र विशेष कार्यक्रममा पनि २०० प्रतिशत बृद्धि गर्दै तीन करोड पुर्‍याईएको छ । पहिले एक करोड रहेको सो कोषको रकम अहिले तीन करोड पुर्‍याईएको छ ।

उता, जनतालाई भने यो बजेट महंगो साबित भएको छ । सरकारले ल्याएको बजेटले सबै पेट्रोलियम पदार्थमा प्रति युनिट ५ रूपैयाँ बृद्धि गरेको छ । सो रकम भन्सारमा नै तिरेर आउने भएकोले जनताले सीधा महंगीको मार खेप्नुपर्ने भएको छ । त्यस्तै कर्मचारीको तलबबृद्धिले पनि जनतालाई भने महंगीको मारमा पार्ने निश्चित छ ।पेटोलियम पदार्थको मूल्यवृद्धि भएपछि सार्वजनिक यातायात लगायतका क्षेत्रमा समेत मूल्यवृद्धि हुनेछ र यसले समग्रमा मूल्यवृद्धि भई सर्वसाधारणको ढाड सेकिने भएको छ ।