कर तिर्ने भाका थपियो

काठमाडौं । बागमती अञ्चलको भौतिक पूर्वाधार तथा यातायात विकास मन्त्रालयमा काठमाडौंका ८ ओटा यातायात कार्यालयले सवारी साधनको वार्षिक कर र नवीकरणको अवधि ३ महिना थप्न प्रस्ताव पठाएका छन् ।

निषेधाज्ञा खुलेपछि यातायात कार्यालयहरूमा सेवाग्राहीको भीड बढ्दा कोरोना संक्रमणको जोखिम बढेको भन्दै यातायात कार्यालयहरूले कर तिर्ने भाका सार्न प्रस्ताव पठाएका हुन् ।

आर्थिक वर्ष २०७६/७७ को वार्षिक सवारी कर र नवीकरण कर असार मसान्तभित्र बुझाइसक्नु भए पनि बन्दाबन्दीका कारण सरकारले दुई महीना अवधि थपी भदौ मसान्तसम्म जरीवाना नलाग्ने निर्णय गरेको थियो ।

भदौ ३ गतेदेखि काठमाडौं उपत्यकाका प्रमुख जिल्ला अधिकारीले उपत्यकामा निषेधाज्ञा लगाएका थिए । भदौ २५ गतेदेखि निषेधाज्ञा खुकुलो भएपछि काठमाडौंका आठओटै यातायात कार्यालयमा सेवाग्राहीको भीड बढेको छ ।

‘भदौ मसान्तसम्म कर तिरे जरीवाना नलाग्ने निर्णयका कारण कार्यालयमा भीड बढेको छ,’ यातायात व्यवस्था कार्यालय चावहिलका प्रमुख विष्णुकुमार भट्टराईले भन्छन्, ‘सामाजिक दूरीसमेत कायम गर्न नसक्ने अवस्था देखिएपछि कर तिर्ने समय थप्न प्रस्ताव पठाएका हौं ।’