सरकारले रेल खरिद गर्ने, पानीजहाज कार्यालय स्थापना चाँडै

काठमाडौं । सरकारी तहबाटै रेल खरीद प्रक्रिया अगाडि बढाइने भएको छ । मन्त्रिपरिषद्को गत पुस २९ बसेको बैठकको १३ निर्णय सुनाउने क्रममा उक्ता जानकारी गराइएको हो ।

रेल खरिदका लागि भौतिक पूर्वाधार तथा यातायात व्यवस्था मन्त्रालयलाई रेल खरीदका लागि सैद्धान्तिक स्वीकृति दिएको छ ।

जनकपुरको कुर्थादेखि भारतको जयनगरसम्म रेल सञ्चालनका लागि आवश्यक प्रक्रिया अगाडि बढिरहेका बेला सरकारले सरकारी तहमा नै रेल इञ्जिन खरीद गर्न लागेको हो ।

कूल ३५ किलोमिटर लामो उक्त रेलमार्गमा रेल चलाउने तयारी भइरहेका बेला सरकारले सरकारी तहमा नै छलफल गरेर भारतसँग रेल खरीद गर्न लागेको हो ।

सञ्चार तथा सूचना प्रविधि मन्त्रालयमा आज आयोजित पत्रकार सम्मेलनमा सरकारका प्रवक्ता गोकुलप्रसाद बाँस्कोटाले रेलमार्ग सञ्चालनमा ल्याउने उद्देश्यका साथ रेल गाडी खरीद प्रक्रिया अगाडि बढाउन भौतिक मन्त्रालयलाई सैद्धान्तिक स्वीकृति दिइएको जानकारी दिए ।

त्यस्तै, १६ जना कर्मचारीको दरबन्दीसहित पानीजहाज कार्यालय स्थापना गर्ने निर्णय गरिएको छ । यस्तै, आगामी चैत १५ र १६ गते काठमाडौंमा लगानी सम्मेलन गर्ने निर्णयसमेत गरिएको छ ।