चर्कियो तामाकोसीको सेयर विवाद,विरोधमा उत्रिए स्थानीय

काठमाडौं। माथिल्लो तामाकोसी जलविद्युत् आयोजनाको दोलखालीले पाउने १० प्रतिशत आरक्षित सेयर वितरण प्रणाली जनविरोधी भएको भन्दै स्थानीयले विरोधमा उत्रिएका छन् । उनीहरुले १० प्रतिशत सेयर वितरणमा क, ख र ग वर्ग बनाई ३ हजारदेखि ३० हजार रुपैयाँबीचको ठूलो अन्तर राखेर नागरिकलाई विभाजन गर्न खोजिएको भन्दै व्यवस्थापन पक्षको विरोध गर्दै प्रदर्शनसमेत गरेका छन् ।

पैसा नभएकालााई सेयर प्रमाणपत्र धितो राखेर सेयर दिने व्यवस्था मिलाउने पूर्वसहमति पनि उल्लघंन गरिएको भन्दै उनीहरुले आरक्षित १० प्रतिशत सेयर वितरणमा असन्तुष्टि जनाई जिल्ला प्रशासन कार्यालय दोलखामा ७ बुँदे माग राखी ज्ञापनपत्र बुझाएका छन् । दोलखाली जनताका तर्फबाट अघि सारिएका मागलाई १० दिनभित्र सम्बन्धित पक्षले पुरा गर्ने कोशिस नभए सर्वपक्षीय संघर्ष समिति निर्माण गरी सशक्त आन्दोलन चर्काउने उनीहरुको चेतावनी छ ।