भाटभटेनी सुपरमार्केट लुटपाटमा संलग्न व्यक्तिहरू पक्राउ

काठमाडौं । कोटेश्वर भाटभटेनी सुपरमार्केट लुटपाटमा संलग्न व्यक्तिहरू पक्राउ परेका छन् ।

गत शुक्रबार राष्ट्र, राष्ट्रियता, धर्म, संस्कृती र नागरिक बचाउ महाअभियान नेपालका केन्द्रिय अध्यक्ष दुर्गा प्रसाईको नेतृत्वमा राजावादी समूहसहितको संयुक्त आन्दोलनका क्रममा कोटेश्वरस्थित भाटभटेनी सुपरमार्केटमा तोडफोड र लुटपाट भएको थियो ।

यस घटनामा संलग्न व्यक्तिहरू फरार भएपछि, काठमाडौं जिल्लाका विभिन्न स्थानहरूबाट शनिबार र आइतबार ती व्यक्तिहरूलाई खोजतलास गरी पक्राउ गरिएको छ । प्रहरीले ती व्यक्तिहरूसँगका सामान पनि बरामद गरेको र थप अनुसन्धान तथा कारवाहीका लागि उनीहरूलाई प्रहरी वृत्त बानेश्वर पठाइएको छ ।

प्रहरीका अनुसार पक्राउ पर्नेहरूमा नुवाकोट विदुर गाउँपालिका-६ की ४३ वर्षीया सुशीला कुमाल, धरानकी ४१ वर्षीया एलिसा राई, तथा कोटेश्वरकी ७० वर्षीया बालकुमारी कार्की रहेका छन् ।

त्यसैगरी, सिन्धुपाल्चोक चौतारा साँगाचोकगढी नगरपालिका-८ की ३७ वर्षीया निर्मला कार्की, सिन्धुली लामुनटार गाउँपालिका-७ की १५ वर्षीया चित्रमाया बस्नेत, र सिन्धुली तीनपाटन गाउँपालिका-१६ की १७ वर्षीया सुस्मिता बराललाई कोटेश्वर नरेफाँटबाट पक्राउ गरिएको प्रहरीले जनाएको छ ।

साथै, धनुषाका आशिष सिंह, सर्लाहीका प्रेमकुमार महतो र भारतका रवि रन्जन कुमार पक्राउ परेका छन् ।