तीन कम्पनीको साधारण सभा आज हुँदै, के-के छन् एजेण्डा ?

काठमाडौं । सोमबार नेपाल स्टक एक्सचेञ्ज(नेप्से)मा सूचीकृत तीन वटा कम्पनीले साधारण सभा डाकेका छन्। आज एक्सेल डेभलपमेन्ट बैंक, गार्डियन माइक्रो लाइफ र युनाइटेड इदी मर्दी एण्ड आरबी हाईड्रो पावर लिमिटेडले सभा गर्ने भएका हुन् ।

एक्सेल डेभलपमेन्ट बैंक

एक्सेल डेभलपमेन्ट बैंकको १९ औँ वार्षिक साधारण सभा झापाको बिर्तामोडमा रहेको सिद्धार्थ होटलमा बिहान ११ बजे सभा आयोजना हुँदैछ। बैंकको सञ्चालक समितिले गत आवका लागि कुनै प्रकारको लाभांश प्रदान नगर्ने निर्णय गरेकाले उक्त सभामा लाभांशको अजेण्डा पेश हुने छैन । सभामा अन्य उपयुक्त बैंक तथा वित्तीय संस्था एक आपसमा गाभ्ने/गाभिने वा प्राप्ति प्रयोजनका लागि १८ औं वार्षिक साधारण सभाले दिएको अख्तियारीलाई निरन्तर्ता दिदै सो सम्बन्धी सम्पूर्ण कार्य गर्नका लागि सञ्चालक समितिलाई पूर्ण अख्तियारी प्रदान गर्ने र प्रबन्धपत्र तथा नियमावलीमा कुनै संशोधन गर्न नियमनकारी नियकाबाट निर्देशन भएमा सोहि बमोजिम गर्न सञ्चालक समितिलाई अख्तियारी प्रदान गर्ने विशेष प्रस्ताव पारित गरिनेछ ।

यस्तै,अध्यक्षद्वारा प्रस्तुत गरिने आव २०८०/८१ को सञ्चालक समितिको वार्षिक प्रतिवेदनमाथि छलफल गरि पारित गरिनेछ। लेखापरीक्षकको प्रतिवेदन सहितको २०८१ असार मसान्तसम्मको वासलात, नाफा नोक्सान हिसाब तथा नगद प्रवाह विवरणसँग सम्बन्धित अनुसूचीहरुमाथि छलफल गरि पारित गरिनुका साथै आव २०८१/८२ को लागि लेखापरीक्षक नियुक्ती गर्ने र सञ्चालकहरुको नियुक्ती गर्ने प्रस्ताव पारित गरिनेछ । साधारण सभा प्रयोजनका लागि बैंकले गत फागुन २९ गते एक दिनका लागि बुक क्लोज गरिसकेको छ ।

गार्डियन माइक्रो लाइफ

कम्पनीको दोस्रो वार्षिक साधारण सभा विराटनगरमा रहेको होटल एयरपोर्टमा बिहान ११ बजेदेखि सुरु हुनेछ । उक्त सभामा कम्पनी र अन्य कुनै बीमा कम्पनी एक आपसमा गाभ्न, गाभिन वा प्राप्ति गर्न आवश्यक भएको अवस्थामा गाभ्ने/गाभिने वा प्राप्ति गर्ने सम्बन्धी आवश्यक सम्पूर्ण कार्य गर्न सञ्चालक समितिलाइ अख्तियारी प्रदान गर्ने, नियमनकारी नियकायबाट कम्पनीको अधिकृत पूँजी, जारी पूँजी र चुक्ता पूँजी वृद्धि गर्ने निर्देशन आएमा कम्पनीले पूँजी वृद्धि गर्न आवश्यक देखिएमा सोही बमोजिम कम्पनीको अधिकृत पूँजी, जारी पूँजी र चुक्तापूँजी वृद्धि गर्ने सम्बन्धमा सञ्चालक समितिलाई अख्तियारी प्रदान गर्ने र कम्पनीको प्रबन्धपत्र तथा नियमावली संसोधन गर्ने विशेष प्रस्ताव पारित गरिनेछ । सर्वसाधारण सेयरधनीको प्रतिनिधित्व गर्ने २ जना सञ्चालकहरुको नियुक्ति (निर्वाचन)गर्ने, सञ्चालकहरुको बैठक भत्ता, दैनिक भ्रमण भत्ता तथा अन्य सेवा सुविधाका सम्वन्धमा र कम्पनीले सामाजिक उत्तरदायित्व अर्न्तगत गरेको खर्च अनुमोदन समेत गरिनेछ । साधारण सभा प्रयोजनका लागि कम्पनीले गत फागुन २६ गते एक दिनका लागि बुक क्लोज गरेको थियो ।

युनाइटेड इदी मर्दी एण्ड आरबी हाईड्रो पावर

युनाइटेड इदी मर्दी एण्ड आरबी हाईड्रो पावर लिमिटेडको १५ औं वार्षिक साधारण सभा पोखरा कास्कीमा रहेको आभ्या क्लबमा बिहान ११ बजेदेखि सुरु हुनेछ। सभामा गत आर्थिक वर्षका सेयरधनीहरुलाई प्रस्तावित ४ प्रतिशत बोनस सेयर र ०.२११ प्रतिशत नगद लाभांश(कर प्रयोजनका लागि) गरी कुल ४.२११ प्रतिशत लाभांश वितरणको विशेष प्रस्ताव पारित गरिनेछ ।

बोनस सेयर जारीपश्चात कायम हुने चुक्तापूँजीको शतप्रतिशत हकप्रद निष्कासन गरी कम्पनीको पूँजी वृद्धि गर्ने, कम्पनीको प्रबन्धपत्र तथा नियमावलीमा संशोधन गर्ने र नियमनकारी निकायबाट कुनै फेरबदल गर्न निर्देशन भएमा सोही बमोजिम गर्न सञ्चालक समितिलाई पूर्ण अख्तियारी प्रदान गर्ने विशेष प्रस्तावहरु समेत पारित गरिनेछ ।

यस्तै, सभामा सञ्चालक समितिको तर्फबाट अध्यक्षद्वारा प्रस्तुत हुने आर्थिक वर्ष २०८०/८१ को वार्षिक प्रतिवेदनमाथि छलफल गरी पारित गरिनेछ। सभामा लेखापरीक्षकको प्रतिवेदन सहित आव २०८०/८१को वासलात, नाफा नोक्सान हिसाब, नगद प्रवाह विवरण लगायतका अनुसूचीहरु स्वीकृत गर्ने तथा आव २०८१/८२ को लेखापरीक्षणका लागि लेखापरीक्षकको नियुक्ती तथा निजको पारिश्रमिक निर्धारण गर्ने र सञ्चालकहरुको निर्वाचन गर्ने प्रस्ताव समेत पारित गरिनेछ। साधारण सभा तथा लाभांश वितरण प्रयोजनका लागि कम्पनीले गत फागुन २३ गते गते एक दिनका लागि बुक क्लोज गरेको थियो ।