नेपालका ४८ विद्यार्थीलाई क्याम्ब्रिज लर्नर अवार्ड « Devoted for Economic Devlopment, आर्थिक विकासको लागि समर्पित

अर्थबजार स्टोरी

नेपालका ४८ विद्यार्थीलाई क्याम्ब्रिज लर्नर अवार्ड



काठमाडौं। ब्रिटिस काउन्सिलले सन् २०२३ र २०२४ मा क्याम्ब्रिजका विभिन्न परीक्षामा सहभागी भई उत्कृष्ट बनेका नेपाली विद्यार्थीलाई क्याम्ब्रिज लर्नर अवार्डबाट सम्मान गरेको छ। नोभेम्बर २०२३ र जुन २०२४ शृङ्खलामा उत्कृष्टलाई क्याम्ब्रिज लर्नर अवार्ड दिइएको हो।

क्याम्ब्रिज युनिभर्सिटी र ब्रिटिस काउन्सिलले विजेतालाई अवार्ड दिएको हो। सन् २०२४ मा रातो बंगलाका सदीक्षा खड्का र सम्पन्न भण्डारी विश्वकै शीर्ष स्थानमा परेका छन्। क्‍याम्ब्रिजको एएस लेभलमा खड्का र भण्डारी उत्कृष्ट बनेका हुन्।

नेपालका ४८ भन्दा बढी विद्यार्थीलाई क्याम्ब्रिज इन्टरनेशनलको एएस र ए लेभल परीक्षामा उत्कृष्ट नतिजाका लागि पुरस्कृत गरिएको हो। ३९ विद्यार्थीले एक विषयमा नेपालमा उच्चतम अंक प्राप्त गरेका छन्। अवार्ड पाउनेमा नोभेम्बर २०२३ को परीक्षा शृङ्खलाका १८ र जुन २०२४ शृङ्खलाका २१ विद्यार्थी छन्।

विजेता नेपालका विभिन्न २० विद्यालयका छन्। काउन्सिलका अनुसार नोभेम्बर सन् २०२३ को शृङ्खलामा दीपेन्द्र सुनार, सोनाक्षी श्रेष्ठ, आदेश विष्ट, ग्रेस बोहरा, सक्षम गुरुवाचार्य, अपूर्व सुवेदी, सुयश भट्टराई, निक चेम्जोङ, बरदा ज्ञवाली, समृद्धा निरौला, शब्दा गौतम, साक्षत पन्त, मयंकशंकर झा, मयललाल प्रधान, निश्चित न्यौपाने छन्।

सन् २०२३ मा नेपालमा काष्ठमण्डप ए लेभल एकेडेमीका निश्चित न्यौपाने र बुढानीलकण्ठ स्कुलकी याशाश्री मल्लले प्रथम स्थान हासिल गरेका छन्।

यस्तै, सन् २०२४ को शङ्खलामा इसान शेखर खड्का, प्रत्यूष क्षेत्री, यात्रा केसी, आयुशा घिमिरे, इमरान शर्मा, विधि खड्का, अनुपकुमार आयडी, अन्वेश साह, लोचन जोशी, आर्या डंगोल, राजरत्न घिमिरे, समृद्धा निरौला, समीक्षा शर्मा, सोनाक्षी श्रेष्ठ, समीक्षा शर्मा, यशाश्री मल्ल, शब्दा गौतम, आर्सिया पन्त रहेका छन्।

सन् २०२४ को शृङ्खलामा बुढानीलकण्ठकी आयुशा घिमिरे र समृद्धा निरौलाले प्रथम स्थान हासिल गरेका छन्।

पुरस्कार समारोहमा क्याम्ब्रिज साउथ एसियाका वरिष्ठ उपाध्यक्ष विनय शर्माले उत्कृष्ट विद्यार्थीहरूलाई शैक्षिक उपलब्धिका लागि बधाई दिए। नेपालमा क्याम्ब्रिजको परीक्षाको लोकप्रियता बढ्दै गएकोमा शर्माले खुसी व्यक्त गरे।

ब्रिटिस काउन्सिलकी परीक्षा निर्देशक तथा महाप्रबन्धक प्रतिष्ठा थापा रायमाझीले क्याम्ब्रिज ए लेभलमार्फत विद्यार्थीहरूलाई अवसर सहज बनाउन तथा उच्च शिक्षासँगै सीप प्रदान गर्न पाउँदा काउन्सिलले गर्व गरेको बताइन्।

प्रकाशित : २१ फाल्गुन २०८१, बुधबार २०:१७