१३औँ अन्तर्राष्ट्रिय औद्योगिक व्यापार मेला भकुटीमण्डपमा सुरु

काठमाडौं ८ बैशाख । उपप्रधान तथा अर्थमन्त्री कृष्णबहादुर महराले साना उद्योगलाई प्रोत्साहन गर्नका लागि सरकार तयार रहेको बताएका छन् । घरेलु तथा साना उद्योग महासङ्घले आयोजना गरेको १३औँ अन्तर्राष्ट्रिय औद्योगिक व्यापार मेला तथा नवीनतम् प्रविधि प्रदर्शनी–२०७४ को बिहिबार भकुटीमण्डपमा उद्घाटन गर्दै महराले साना उद्योगको उत्पादन बढाउनका लागि प्रोत्साहन गर्न सरकार तयार रहेको बताए ।
निर्यात बढाउनका लागि साना उद्योगको मुख्य भूमिका रहेको हुन्छ” तेसैले– साना उद्योगलाई यसपटकको बजेटमा प्रथामिकतामा राखेको उनले बताए । अर्थमन्त्री महराले आन्तरिक उत्पादन बढाएमात्र व्यापार सन्तुलन गर्न सकिने भन्दै स–साना उद्योगबाट आन्तरिक उत्पादन बढाउनु आवश्यक रहेको धारणा राखे । अर्थमन्त्री महराले उद्योगलाई आधुनिकीकरण गरेर निर्यातमुखी बनाउनुपर्नेमा जोड दिए ।
विज्ञान तथा प्रविधिमन्त्री प्रेमबहादुर सिंहले स्थानीय तहको निर्वाचन भए देशको विकास सम्भव भएको भन्दै तोकिएको समयमा निर्वाचन हुनुपर्ने बताए । उनले विकास र अनुसन्धानमा बजेट खर्च गर्नुपर्ने उल्लेख गर्दै प्रविधिको उच्चतम प्रयोग गरेर दिगो विकास हासिल गर्न सकिने बताए ।
पाँच दिनसम्म चल्ने मेलामा घरेलु उत्पादनका २१५ कक्ष रहेका छन् जसमध्ये भारत पाकिस्थान, बङ्गलादेश र चीनका ३० कक्ष रहेका छन् ।