काठमाडौं । कोरोना संक्रमण तीव्र बन्दै गएपछि अत्याधुनिक खोप भण्डारण कक्ष बनाउन १८ महिना अघि स्वास्थ्य सेवा विभागले एक निजी कम्पनीसँग ठेक्का सम्झौता गर्याे । तर, सम्झौताको १८ महिना बितिसक्दासमेत भण्डारण कक्षको जगसमेत खनिएको छैन ।
सरकार र कौशिल बस्नेत¬ कुँवर जेभीबीच ३० फागुन २०७६ मा भण्डारण कक्ष निर्माण सम्झौता भएको थियो । जसमा दुई वर्षभित्र सम्पन्न गर्ने उल्लेख छ । तर, स्वास्थ्य सेवा विभाग र ठेकेदार कम्पनीको लापरवाहीका कारण भण्डारण कक्षा नबन्दा आगामी पुसमा ल्याइने भनिएको कोरोनाविरुद्धको फाइजर र मोर्डनाको खोप कहाँ भण्डारण गर्ने भन्ने समस्या भएको छ ।
यी खोपलाई ८० डिग्रीभन्दा कम तापक्रममा राख्नुपर्ने हुन्छ । तर, नेपालसँग हाल यो खोप भण्डारण गर्न सक्ने स्टोर नै छैन । खोप भण्डारण गर्न भनेरै बनाउन लागिएको भवन सम्झौताको म्याद सकिन ६ महिना बाँकी छ । ठेकेदार कम्पनी विभागका कर्मचारीले बनाउन नदिएको दावी गर्छन् भने विभाग आफूहरूले कुनै अवरोध नगरेको बताउँछ ।
ठेकेदार कम्पनीका प्रतिनिधि विभागका कर्मचारीले कमिसन मागेको दाबी गर्छन् । तर, कुन कर्मचारीले कति कमसिन माग्दा काम रोकिएको हो भन्ने विषयमा भने उनीहरूसँग जवाफ छैन ।
विभाग भने सम्झौता अवधिभित्र काम नगरी ठेकेदार सम्झौता रद्द गर्ने प्रक्रियामा अघि बढेको दाबी गर्छ । भण्डारण कक्ष बनाउने भनिएको स्थानमा अहिले सवारी पार्किङ स्थल बनाइएको छ ।
ठेकेदार कम्पनीका अनुसार भेरिएसन स्वीकृत भएको पत्र र साइड सूचारु गर्न अनुमति नदिएकै कारण काम अड्किएको बताउँछ ।
तर, विभागले भने १ असार २०७७ मै ठेकेदार कम्पनीलाई यो अधिकारसहितको कार्यादेश दिइसकेको बताउँछ ।
विभागका निर्देशक रमेशकुमार खरेलले ठेकेदार कम्पनीलाई लिखित कार्यादेश दिँदै यसको जानकारी विभागका महानिर्देशकदेखि टेकु अस्पतालका स्टोरकिपर केदारनाथ उप्रेतीसम्मलाई दिइसकेको बताए । तर, ठेकेदार कम्पनी भने यो पत्रले साइड क्लियरेन्सको अधिकार नदिएको दाबी गर्छन् ।
विभाग र ठेकेदारको जुहारीका कारण एक करोडभन्दा बढी डोज खोप भण्डारण गर्न मिल्ने गरी ८ करोड ४० लाख २० हजार ७ सय ५३ रुपैयाँमा ठेक्का लागेको भण्डारण कक्ष अलपत्र परेको छ ।
ठेकदार कम्पनीले विभागले नगर्ने भए बजेट सहरी विकास मन्त्रालयमा पठाउनसमेत अनुरोध गरेका थिए । तर, आफू पनि फायल अगाडि नबढाउने र सहरी विकास मन्त्रालयमा पनि नपठाउने रणनीतिमा लेखा अधिकृत ठाकुर छन् । महामारीको लागि आएको खोप भण्डारण गर्न बनाउन लागेको भवनको फायल समेत सदर नगर्ने कर्मचारीप्रति मन्त्रालय र विभागका उच्च अधिकारीले नै संरक्षण गरेको अधिकारीहरू बताउँछन् ।
ठेकदार कौशिल बस्नेत भन्छन्- घुस दिन्न बरू दुई बोरा सिमेन्ट बढी हालेर भवन बनाउँछु
महामारीको बेला आवश्यक ठानेर बनाउन लागेको खोप भण्डारण स्टोरको काम रोक्नु दुःखद पक्ष हो । यस्तो बेला पनि घुसका लागि फायल नै स्वीकृत नगर्नु आश्चर्यको विषय छ । मसँग प्रत्यक्षरूपमा पैसा मागिएको छैन तर, अवरोधको अवस्था हेर्दा शंकास्पद छ । तर, म एक रुपैयाँ पनि घुस दिने पक्षमा छैन ।
मैले कुनै कर्मचारीलाई घुस दिनुपर्छ भने त्यसको पैसाले दुई बोरा सिमेन्ट बढी किनेर भवनमै लगाउँछु । भवन बनाउने ठाउँमा देखिएको केही समस्यासमेत अहिले समाधान भएको छ । अब बाँकी काम भनेको भेरिएसन स्वीकृत भएको पत्र र साइड सूचारु गर्न एउटा पत्र दिनुपर्ने हो । तर, विभागबाट भेरिएसन स्वीकृत भएको जानकारी पनि दिएको छैन र काम सुरु गर्न पत्र पनि दिएको छैन ।
कर्मचारीले ढिलो गर्दा यसबीचमा झन्डै ४० लाख रुपैयाँ लागत बढेको छ । तर, पनि म सम्झौता भएकै रकममा भवन बनाउन तयार छु । यसका लागि कर्मचारी तयार छैनन् जसले गर्दा फायल अड्काएर राखिएको छ ।
Comment