भदौका लागि वाणिज्य बैंकहरुकाे नयाँ ब्याजदर सार्वजनिक, कुनकाे कति ?

काठमाडौं । वाणिज्य बैंकहरुले भदौका लागि नयाँ ब्याजदर सार्वजनिक गरेका छन् । नयाँ प्रकाशित ब्याजदर अनुसार कुनै बैंकले ब्याजदर घटाएका छन् भने कुनै बैंकले बढाएका छन्। साथै कुनै बैंकले भने ब्याजदर स्थिर राखेका छन् ।

वाणिज्य बैंकहरुले लामो समयदेखिको भद्र सहमति अन्त्य गरेपछि साउनदेखि आफूखुसी ब्याजदर निर्धारण गर्दै आएका छन् । बैंकहरुले निक्षेपको ब्याजदर परिर्वतन गर्दा औसत १० प्रतिशत विन्दुले घटाउन वा बढाउन सक्ने व्यवस्था रहेको छ । नयाँ प्रकाशित ब्याजदर अनुसार बैंकहरुको अधिकतम ब्याजदर १०.८९६ प्रतिशत नै देखिएको छ।

कुन वाणिज्य बैंकको ब्याजदर कति ?

भदौका लागि ७ वाणिज्य बैंकले मुद्दति निक्षेपमा १०.८९६ प्रतिशत र ५ वटा बाणिज्य बैंकको भने ब्याजदर १० प्रतिशत भन्दा माथी छ । साथै, बाकी ८ बैंकको व्याजदर १० प्रतिशत भन्दा तल छ । एक महिनामा ४ बैंकले ब्याजदर घटाएका छन् भने ४ बैंकले साउन महिनाकै ब्याजदरलाई निरन्तरता दिएका छन् । १२ बैंकको ब्याजदर भने बढेको छ ।

मुद्दति निक्षेपमा १०.८९६ प्रतिशत ब्याजदर दिनेमा ग्लोबल आइएमई, एनआइसी एसिया, नेपाल बैक, कुमारी बैंक, सानिमा बैंक, सिटिजन बैंक र कृषि विकास बैंक रहेका छन् । त्यस्तै, १० प्रतिशत भन्दा माथी हुनेमा प्राइम बैंक, नबिल बैंक, लक्ष्मी सनराइज बैंक, एभरेष्ट बैंक र प्रभु बैंक रहेका छन् । सबैभन्दा कम ब्याजदर भने स्ट्याण्डर्ड चार्टर्ड बैंकको रहेको छ। यस बैंकको मुद्दति निक्षेपमा अधिकतममा ८.९२ प्रतिशत ब्याज दिने भएको छ। संस्थागत तर्फ भने यस बैंकले ६.९२ प्रतिशतका दरले ब्याज दिनेछ।