बीबीसी हिन्दीको दिल्ली र मुम्बईस्थित कार्यालयमा भारतीय आयकर विभागको छापा

काडमाडौं । बीबीसी हिन्दीको दिल्ली र मुम्बईस्थित कार्यालयमा भारतीय आयकर विभागले छापा मारेको छ। करिब ६०/७० जना विभागका कर्मचारीले कार्यालयमा छापा मारेको भारतीय सञ्चार माध्यमहरुले जनाएका हुन् ।

विभागले विभिन्न कागजातहरुको प्रमाणिकरणका लागि बीबीसी परिसरभित्र सर्वेक्षणको काम अघि बढाइएको पनि जनाएका छन्। आयकर विभागले बीबीसीमा कार्यरत सम्पूर्ण कार्मचारीहरुको मोबाइल फोन पनि जफत गरेको छ ।

बीबीसीको दिल्लीस्थित कार्यालयमा कार्यरत कर्मचारीहरुलाई आयकर विभागको टोलीले घर पठाइदिएको छ । यता, मुम्बईमा बीबीसीका दुई वटा कार्यालय रहेका छन् । जसमध्ये एउटामा आयकर विभागले सर्वेक्षण अघि बढाएको छ भने अर्को कार्यालयका कर्मचारीहरुलाई घर पठाइएको छ ।

बीबीसीले भर्खरै भारतीय प्रधानमन्त्री नरेन्द्र मोदी संलग्न रहेको २००२ को गुजरात हिंसासँग सम्बन्धित वृत्तचित्र सार्वजनिक गरेको थियो । देशभरका विभिन्न कलेज र विश्वविद्यालयमा स्क्रिनिङ गरिए पनि सामाजिक सञ्जाल र अनलाइन च्यानलमा उक्त वृत्तचित्र प्रसारणलाई भारतको केन्द्र सरकारले प्रतिबन्ध लगाएको छ । (एजेन्सी)