एनआरएनको माग अनुरुप नागरिकता विधेयक पारित हुने आश्वासन

काठमाडौं । गैरआवासीय नेपाली संघका अध्यक्ष कुल आचार्यको नेतृत्वमा प्रधानमन्त्री शेरबहादुर देउवासंग भेटघाट सम्पन्न भएको छ । प्रधानमन्त्री निवास बालुवाटारमा भएको भेटमा प्रधानमन्त्री देउवाले एनआरएनको माग पनि समेटेर सरकारले नागरिकता विधेयक अगाडि बढाएको बताएका छन्।

संविधानमा गैरआवासीय नेपाली नागरिकताको लागि भएको व्यवस्था अनुसार नै विधेयक पारित हुनेमा प्रधानमन्त्री देउवाले आश्वस्त गराए।

उक्त अवसरमा संघका कार्यकारी अध्यक्ष कुल आचार्य, अध्यक्ष डा बद्रि केसी, संस्थापक अध्यक्ष डा उपेन्द्र महतो लगायतका पदाधिकारीहरुले यो विधेयक ल्याउन सरकारले चालेको सकारात्मक कदमको लागि धन्यवाद व्यक्त गरेका छन् ।

कार्यक्रममा संघको तर्फबाट युरोपका क्षेत्रीय संयोजक चिन्तामणि सापकोटा, युरोप क्षेत्रका युवा संयोजक रमेश काफ्ले, पूर्व आइसिसि सदस्य पशुपति भण्डारी लगायतका प्रतिनिधिहरु, गैरआवासीय नेपाली नागरिकता सम्बन्धी फोकल पर्सन सरोज दाहाल लगायतको उपस्थिति रहेको थियो । कार्यक्रममा सचिवालयका अधिकृत कुनाल मिश्राको उपस्थिति रहेको थियो ।