काठमाडौ। कोरोना विरुद्धको खोप लगाउन इच्छुकलाई सरकारले आवेदन फारम भर्न आव्हान गरेको छ। नेपाल सरकार, स्वास्थ्य तथा जनसङ्ख्या मन्त्रालयले एक सूचना प्रकाशित गरी यस्तो आव्हान गरेको हो।
कोभिड-१९ विरुद्धको खोप लगाउन चाहने १८ वर्ष र सो भन्दा बढी उमेरका व्यक्तिहरूले आफैले प्रि- रजिस्ट्रेसन फाराम भर्ने सम्बन्धी शीर्षकमा प्रकाशित सो सूचनामा लेखिएको छ- स्वास्थ्य तथा जनसङ्ख्या मन्त्रालय सूचना व्यवस्थापन इकाईको निर्णय अनुसार कोभिड-१९ विरुद्धको खोप लगाउन चाहने १८ वर्ष र सो भन्दा बढी उमेरका व्यक्तिहरूले आफैले प्रि-रजिस्ट्रेशन फाराम भर्न तथा भराउनका लागि साइट र एप तयार गरिएको छ ।
यो स्वैच्छिक फाराम भरेका १८ वर्ष र सो भन्दा बढी उमेरका व्यक्तिहरूले प्राथमिकता र खोपको उपलब्धताको आधारमा खोप लगाउन पाउने छन् ।
मन्त्रालयले यो स्वैच्छिक व्यक्तिगत आवेदन फाराम भएको र यो फाराम हालसम्म खोप नलगाएको १८ वर्ष र सो भन्दा बढी उमेरका व्यक्तिहरूले भर्न सक्ने जनाएको छ । यो आवेदन फारामबाट प्राप्त भएका विवरण पालिका स्तरमा खोप सँग सम्बन्धित योजना तथा व्यवस्थापन गर्नका लागि सहज हुने मन्त्रालयको भनाई छ ।
तर,यो फाराम भर्ने बित्तिकै खोप लगाउने सुनिश्चितता भने नहुने बताउँदै मन्त्रालयले खोप लगाउन इच्छा व्यक्त गर्न व्यक्तिगत विवरण भर्नको लागि भन्दै www.vaccine.mohp.gov.np लिङ्कमा क्लिक गर्न भनेको छ ।
Comment